სამაუწყებლო კომპანია „რუსთავი 2“-ის 91%-იანი წილის მფლობელები ლევან და გია ყარამანიშვილები ხვალიდან „რუსთავი 2“-ის კოლექტივთან პირდაპირი კონსულტაციების რეჟიმში გადადიან.
ამის შესახებ აღნიშნულია განცხადებაში, რომელიც ლევან ყარამანიშვილის „ფეისბუქის“ პირად გვერდზე გავრცელდა.
ყარამანიშვილები უკმაყოფილებას გამოთქვამენ მათ მიერ გუშინ გავრცელებული განცხადების „რუსთავი 2“-ის ეთერში გაშუქების გამო და აცხადებენ, რომ მათი განცხადება, პრაქტიკულად, არ გაშუქებულა.
„სამწუხაროა, რომ ჩვენი გუშინდელი განცხადება, რომელიც 15:25 საათზე გავრცელდა, პრაქტიკულად არ გაშუქებულა (მშრალად გავიდა 6 საათიანი „კურიერის“ შუაში, თემის გაუშლელად და საერთოდ არ გაშუქებულა 9 საათიან „კურიერში“). ეს იმ ფონზე, როცა გენერალური დირექტორის მიერ მოწვეულ თათბირს ამხელა დრო დაეთმო ეთერში.
ჩვენი განცხადება რომ გაშუქებულიყო, საზოგადოება და ჩვენი კოლექტივი ბევრ უხერხულობას აცდებოდა (პირველ რიგში, ზემოხსენებული თათბირის კონტექსტში).
ამიტომ, ხელახლა, უცვლელად ვავრცელებთ ჩვენს გუშინდელ განცხადებას (სადაც ხაზს ვუსვამთ, რომ არანარი შუამავალი შპს-ს მონაწილეობა არ განიხილება) და ხვალიდან გადავდივართ კოლექტივთან პირდაპირი კონსულტაციების რეჟიმში“,- აღნიშნულია განცხადებაში.