ისრაელის პრემიერ-მინისტრმა, ბენიამინ ნეთანიაჰუმ გააკრიტიკა ბრიტანეთის „სამარცხვინო“ გადაწყვეტილება, შეაჩეროს იარაღის ზოგიერთი კომპონენტის გაყიდვა, რომელსაც ისრაელის ჯარები ღაზაში იყენებენ.
დიდი ბრიტანეთი ისრაელისთვის იარაღის მიწოდებას ნაწილობრივ აჩერებს. შესაბამისი განცხადება თემთა პალატაში სიტყვით გამოსვლისას ბრიტანეთის საგარეო საქმეთა მინისტრმა, დევიდ ლემიმ გააკეთა და აღნიშნა, რომ ლონდონმა გადაწყვეტილება საექსპორტო ლიცენზიების შემოწმების შემდეგ მიიღო, რომელმაც იარაღის საერთაშორისო ნორმების დარღვევით გამოყენების საფრთხე გამოავლინა.
„ბრიტანეთის სამარცხვინო გადაწყვეტილება არ შეცვლის ისრაელის მტკიცე განწყობას, დაამარცხოს „ჰამასი“, გენოციდური ტერორისტული ორგანიზაცია, რომელმაც 7 ოქტომბერს სასტიკად მოკლა 1200 ადამიანი, მათ შორის ბრიტანეთის 14 მოქალაქე“, – აღნიშნა ისრაელის მთავრობის მეთაურმა.
„ბრიტანული იარაღით ან მის გარეშე, ისრაელი გაიმარჯვებს ამ ომში და უზრუნველყოფს ჩვენს საერთო მომავალს“, – დასძინა მან.