რას წერს გაუჩინარებული მამაკაცის მეუღლე?

“სიცოცხლე მისი საუკეთესო თვისებაა”, – ეს სიტყვები 25 მარტს გაუჩინარებული შალვა ბაკურაძის მეუღლეს, თათია კოკაიას ეკუთვნის.
როგორც კოკაია ფეისბუკის გვერდზე წერს, მას მეუღლის გამოჩენის იმედი აქვს და იმედს გამოთქვამს, რომ შესაძლოა, განმარტოება მოისურვა.
“მეგობრებო, დიდი მადლობა ყველას ყურადღებისთვის. არ ვემხრობი ამდენ გაზიარებას, რადგან ცალკე ნინიტა მყავს საავადმყოფოში, გადასხმებს ვუკეთებ და იმდენი ადამიანი რეკავს, ვერც ბავშვზე და ვერც შაკოს ამბავზე ნორმალურად ვერ ვკონცენტრირდები. ვისაც საჭიროა, სცოდნოდა ეს ამბავი, ყველამ უკვე იცის. შაკოს ხასიათიდან გამომდინარე, ნებისმიერ ადგილას შეიძლება განმარტოებულიყო, რაც თითოეულ ჩვენგანს აზრად მოგვივა, ან – არა. ამიტომ ახლა ველოდებით კამერის ჩანაწერს, რომ მიმართულება მოგვცეს შემდეგი მოქმედებისთვის. არანაირად ცუდს არ მიგრძნობს გული. უბრალოდ, ბოლო 2 დღეა, არ იყო ხასიათზე, მეც, ალბათ, ვერ გამოვიჩინე შესაბამისი ყურადღება და ცოტა ეგოისტურად მოგვექცა. დიდი იმედი მაქვს, ყველაფერი კარგის და იმის, რომ სიცოცხლე მისი საუკეთესო თვისებაა“, – წერს თათია კოკაია.
ბოლო ინფორმაციით, სამართალდამცველებმა კამერების ჩანაწერი ამოიღეს, სადაც ჩანს, რომ შალვა ბაკურაძე ტაქსიში ჯდება. ბაკურაძის ცოლის ინფორმაციით, ტაქსის მძღოლი დაიკითხა, რომელიც გამოძიებას კონკრეტულ კვალზე გაიყვანს და შესაძლოა, მისი მეუღლის ადგილსამყოფელი დაადგინონ.
„ამ ეტაპზე, ნანახია კამერა, საიდანაც ჩანს, რომ ტაქსიში ჯდება. ახლა მუშავდება მეორე კამერა, უკვე 112-ში, სადაც მანქანის იდენტიფიცირებას შეძლებენ და მძღოლს დაკითხავენ. ეს უკვე კონკრეტულ კვალზე გაგვიყვანს. მძღოლი დაკითხეს. ამბობს, რომ ვერ იხსენებს ამ მარშრუტს, რაც მე გამორიცხული მგონია. სავარაუდოდ, არ უნდა ზედმეტი პრობლემები, არ ვიცი. აგრძელებენ მუშაობას კამერებზე, მიმართულების დასადგენად. დამპირდნენ, რომ მძღოლს კიდევ დაელაპარაკებიან და აუხსნიან, რომ სასიკეთო საქმეში დაგვეხმაროს“, – წერს თათია კოკაია.
შეგახსენებთ, რომ 43 წლის შალვა ბაკურაძეს ოჯახის წევრები და ახლობლები უკვე მესამე დღეა, უშედეგოდ ეძებენ.