ბიძინა ივანიშვილი არის მშვიდობის მთავარი გარანტი ამ ქვეყანაში. შესაბამისად, ასეთი გეგმების მთავარი ადრესატიც შეიძლება იყოს ბუნებრივია ის, – განაცხადა „ქართული ოცნების“ საარჩევნო შტაბის ხელმძღვანელმა, პრემიერ-მინისტრმა ირაკლი კობახიძემ გადაცემა „იმედი LIVE“-ში.
გადაცემის წამყვანებმა მას რადიკალების გეგმებსა და მომდინარე საფრთხეებზე ჰკითხეს. ირაკლი კობახიძის თქმით, ბიძინა ივანიშვილის უსაფრთხოების დასაცავად აუცილებელია განსაკუთრებული უსაფრთხოების ზომების დაცვა.
„სახელმწიფო უსაფრთხოების სამსახურში არსებობს მიმდინარე გამოძიება ასეთ თემასთან დაკავშირებით. შესაბამისად, ბუნებრივია ჩვენ გვმართებს განსაკუთრებული სიფრთხილე და ამას უკავშირდება ის ზომები, რომელიც მიიღება ივანიშვილის უსაფრთხოების დასაცავად“, -განაცხადა ირაკლი კობახიძემ.
მისივე თქმით, რა თქმა უნდა მიღებული უსაფრთხოების ზომები ოპონენტებს აღიზიანებთ, რადგან მათ გეგმებს ეწინააღმდეგება.
„რა თქმა უნდა რეალურად ეს ზომები უპირისპირდება მათ მიზნებს და მათ სურვილებს. არა მარტო ღიზიანდებიან, თქვენ ხედავთ, რომ მათი ტელევიზიები აგორებენ რაღაც კამპანიებს ამ თემასთან დაკავშირებით. ეს არის რაღაც ერთგვარი ბულინგი, რომლის მიზანია, რომ შენ გაიძულონ, რომ უსაფრთხოების ზომები აღარ მიიღო. რატომ? იმიტომ, რომ ინტერესი მათ ეს აქვთ. მათ უნდათ, რომ მაქსიმალურად შექმნან არა უსაფრთხო გარემო, თუმცა ჩვენ ამას რა თქმა უნდა ვერ დავუშვებთ. ვერც მათი ბულინგი, ვერც მათი შანტაჟი და ვერც მათი პროვოკაციული სიუჟეტები ბუნებრივია ვერ გაჭრის“, – განაცხადა ირაკლი კობახიძემ.