26 მარტს ტელეკომპანია “რუსთავი 2”-ის გადაცემა “კურიერი P.S”.-ში თბილისში მიმდინარე მშენებლობის შესახებ გასულ გადაცემაში შეცდომა გაიპარა.
სიუჟეტის მიხედვით, აბაშიძის ქუჩაზე, ერთ-ერთი სამსართულიანი სახლიდან რამდენიმე სანტიმეტრში, 11-სართულიანი კორპუსი შენდება, სამშენებლო კომპანიის იურისტი კი თბილისის მერის, დავით ნარმანიას ძმაა. მასალის მიხედვით, სწორედ ის ლობირებს ამ და კიდევ რამდენიმე უკანონო მშენებლობას. თუმცა გადაცემის გასვლის შემდეგ გაირკვა, რომ ირაკლი ნარმანიას დავით ნარმანიასთან ნათესაური კავშირი არ აქვს . როგორც “მედიაჩეკერს” სიუჟეტის ავტორმა აკაკი გოგიჩაიშვილმა განუცხადა, იგი დაეყრდნო ალეკო ელისაშვილის მიერ მიწოდებულ ინფორმაციას. ელისაშვილმა კი განმარტა, რომ ინფორმაცია ნარმანიას ძმის შესახემ ერთ-ერთი მოქალაქისგან მიიღო.
კითხვაზე, იყო თუ არა ალეკო ელისაშვილის მიერ მიწოდებული ინფორმაცია გადამოწმებული, სანამ ის სიუჟეტში მოხვდებოდა, აკაკი გოგიჩაიშვილი მედიაჩეკერს ასე პასუხობს:
“არა არ გადაგვიმოწმებია, რომ გადაგვემოწმებინა, ხომ არ მოგვივიდოდა ეს შეცდომა… ეს ჩემი შეცდომა იყო, არხი ამ შეცდომას გამოასწორებს”. მისი თქმით, მომავალ გადაცემაში მაყურებელს შეცდომის დაშვების მიზეზებს განუმარტავენ.
www.postalioni.com