მოახლოებული არჩევნები და სანქციების მორიგი ტალღა ამერიკის შეერთებული შტატებისგან – „ქართული ოცნება“ სანქციებს უსაფუძვლოს უწოდებს. მმართველ გუნდში აცხადებენ, რომ მსგავსი ქმედება შტატებისგან საქართველოს შიდა საქმიანობაში უხეში ჩარევაა და ვერცერთი ტიპის სანქცია ხალხის მიერ „ქართული ოცნებისთვის“ მინიჭებული ლეგიტიმაციის საპირწონე ვერ გახდება.
„ამ სანქციების განმცხადებელმაც კი არ იცის, რის საფუძველზე, რატომ [დაწესდა სანქციები] – ყოველ შემთხვევაში, ჩვენთვის არ მოუყოლია არც საჯაროდ და არც არასაჯაროდ. [სანქციების დაწესება] ნამდვილად სხვა სახელმწიფოს უხეში ჩარევა არის [შიდა საქმიანობაში]. საქართველოს სახელმწიფოს საქმიანობაში ვერ იქნება სანქცია საპირწონე საკუთარი ხალხისა და საკუთარი ქვეყნის წინაშე ჩვენი მოვალეობების. ამიტომ, თავისთავად, უპირატესი იქნება ის, რისთვისაც ქართველმა ხალხმა აგვირჩია“, – აცხადებს პარლამენტის თავმჯდომარის მოადგილე ნინო წილოსანი.