ჯარების გაყვანა უნდა მოხდეს აუცილებლად საქართველოს ოკუპირებული ტერიტორიებიდან და შემდგომ უკვე შესაძლებელია დანარჩენ პროცესზე საუბარი, – განაცხადა იურიდიულ საკითხთა საპარლამენტო კომიტეტის თავმჯდომარის პირველმა მოადგილე დავით მათიკაშვილმა გადაცემა „დღის ქრონიკაში“ რუსეთის საგარეო საქმეთა მინისტრის, სერგეი ლავროვის პასუხად.
დავით მათიკაშვილის თქმით, ის ინიციატივა, რომელიც მშვიდობის დამყარებაში თანადგომას და ხელშეწყობას გულისხმობს, ბუნებრივია, პოზიტიურია, თუმცა ამ განცხადების პოზიტიურობის მნიშვნელობა გაიზრდება მაშინ, როდესაც მოხდება მისი გამყარება რეალური ქმედებებით.
„საზოგადოებამ ძალიან კარგად იცის, ჩვენ არაერთგზის გვაქვს გაცხადებული, რომ ჩვენთვის ძალიან დიდი მნიშვნელობა აქვს ტერიტორიული მთლიანობის აღდგენას მშვიდობიანი მეთოდით და მშვიდობით, ურთიერთშერიგებით. არცერთი წამით, არცერთ დონეზე არ არის შეცვლილი რაიმე სახით პოლიტიკა ოკუპირებულ ტერიტორიებთან მიმართებით. პირიქით, ეს არის ის ტერიტორიები, რომლებიც არის ოკუპირებული დღეს საქართველოსი და სადაც საჭიროა დეოკუპაცია.
ის კონტექსტი, რომელიც ამ განცხადებაში აფხაზეთთან და სამხრეთ ოსეთთან, ანუ ცხინვალის რეგიონთან, ასე ვთქვათ, რუსულ დამოკიდებულებას შეიცავს, ბუნებრივია, ამას ჩვენ არ ვეთანხმებით და ვერც ვერასდროს დავეთანხმებით, მაგრამ ის ინიციატივა, რომელიც მშვიდობის დამყარებაში თანადგომას და ხელშეწყობას გულისხმობს, ბუნებრივია, პოზიტიურია, თუმცა ამ განცხადების პოზიტიურობის მნიშვნელობა გაიზრდება მაშინ, როდესაც მოხდება მისი გამყარება რეალური ქმედებებით.
ეს რეალური ქმედება, პირველ რიგში, არის, ცხადია დეოკუპაცია ქვეყნის ტერიტორიის, რომელიც ჯარების გაყვანით იწყება. ჯარების გაყვანა უნდა მოხდეს აუცილებლად საქართველოს ოკუპირებული ტერიტორიებიდან და შემდგომ უკვე შესაძლებელია დანარჩენ პროცესზე საუბარი“, – აღნიშნა დავით მათიკაშვილმა.