გურჯაანის ავარიაში დაშავებული მცირეწლოვანის გარდაცვალების შესახებ გავრცელებულ არასწორ ინფორმაციას, ახლობლები იაშვილის სახელობის ბავშვთა ცენტრალური საავადმყოფოს ექიმების დაუდევრობასა და უყურადღებობას უკავშირებენ.
ამის შესახებ პაციენტის ახლობლები “პირველთან” საუბარში აცხადებენ.
მათი ინფორმაციით, ექიმი, რომელმაც მცირეწლოვანს არასწორი დიაგნოზი დაუსვა, კლინიკის ხელმძღვანელობამ გაათავისუფლა. თუმცა, “პირველთან” საუბარში ექიმის ვინაობას ვერ ასახელებენ.
თავის მხრივ, იაშვილის სახელობის ბავშვთა ცენტრალურ საავადმყოფოში ბრალდებებს უარყოფენ და ექიმის გათავისუფლების შესახებ ინფორმაციას არ ადასტურებენ.
“ეს ყველაფერი ჭორია, ტყუილია. ექიმი არ გაუთავისუფლებიათ. ბავშვი კომატოზურ მდგომარეობაშია და რეანიმაციულ განყოფილებაში იმყოფება. რეანიმატოლოგისათვის ეს არის ორჯერ ორი”, – განაცხადეს “პირველთან” საუბარში კლინიკის პრესსამსახურში.
გუშინ გავრცელდა ინფორმაცია, რომ 29 მარტს გურჯაანში ავარიაში დაშავებული 4 წლის ბავშვი იაშვილის ბავშვთა კლინიკაში გარდაიცვალა. დღეს კი გავრცელდა ინფორმაცია, რომ ბავშვი ცოცხალია და კვლავ კომატოზურ მდგომარეობაში იმყოფება.