“ცენტრ პოინტის” ერთ-ერთი დამფუძნებლის, რუსუდან კერვალიშვილის შვილმა ნინო დარასელმა გლდანის # 8 საპყრობილესთან, სადაც გურამ რჩეულიშვილის გათავისუფლებას მისი ოჯახის წევრები და ახლობლები ელოდებიან მედიასთან კომენტარი გააკეთა. დარასელის თქმით, გუკას გათავისუფლება აუცილებელი იყო იმისთვის, რომ “ცენტრ პოინტის” საქმეები დაიძრას და დაზარალებულებმა სახლებში შესვლა დაიწყონ.
“ძალიან ბედნიერი ვარ, რომ ერთი ოჯახის წევრი მაინც იქნება თავისუფლებაზე, თან ვახოს ჯანმრთელობის მდგომარეობა კარგი არ არის და მიხარია, რომ მისი შვილი გვერდით იქნება. დარწმუნებული ვარ, ჩვენ ერთად შევძლებთ იმ საქმეების წინ წაწევას, რომელიც ამ საქმესთანაა დაკავშირებული. თავს უფრო ძლიერად ვიგრძნობ. რაც შეეხება მოსამართლის გადაწყვეტილებას, არაფერზე აღარ მინდა საუბარი, რა იყო სწორი და რა არა. მთავარია, საქმე დაიძრას და რაღაც სინათლე გამოჩნდეს გვირაბის ბოლოს. მიხარია, რომ გუკა გამოვა და ნახავს, რომ გისოსებს მიღმა გაზაფხულია.
ის “ცენტრ პოინტის” საქმეებში ჩახედულია და მისი ჩართულობა დაზარალებულების დაკმაყოფილების პროცესს ბევრად უფრო დააჩქარებს”, – განაცხადა დარასელმა.
სასამართლომ გურამ რჩეულიშვილი გირაოს სანაცვლოდ გაათავისუფლა.