გაბრიელიუს ლანდსბერგისმა ლიეტუვის კონსერვატიული პარტიის „სამშობლოს კავშირი“ თავმჯდომარის თანამდებობა დატოვა.
ასეთი გადაწყვეტილება მან ქვეყანაში ჩატარებული არჩევნების შემდეგ მიიღო, რომლის შედეგადაც მმართველმა კოალიციამ, რომლის წევრიც მის პარტია იყო, უმრავლესობა დაკარგა. ლანდსბერგისის თქმით, მან ამომრჩევლებისგან სიგნალი მიიღო.
„ამომრჩევლების სიგნალი საკმაოდ მკაფიო იყო, როგორც პარტიისთვის, ასევე პირადად ჩემთვის. შეცდომა იქნებოდა მისი არგაგონება. მე ეს სიგნალი გავიგე, მას სერიოზულად მოვეკიდე და გადავწყვიტე, რომ თავმჯდომარის თანამდებობა დამეტოვებინა“, – განაცხადა ლანდსბერგისმა მედიისთვის გამართულ პრესკონფერენციაზე.
მან ასევე აღნიშნა, რომ უარს ამბობს ლიეტუვის პარლამენტის წევრის მანდატზე და რომ პოლიტიკურ კარიერაში პაუზას იღებს.
ლიეტუვის ცენტრალური საარჩევნო კომისიის წინასწარი მონაცემებით, კონსერვატორებმა მეორე ადგილი დაიკავეს და 141-კაციან პარლამენტში მხოლოდ 28 მანდატი მოიპოვეს. პირველ ადგილზე კი სოციალ-დემოკრატიული პარტია გავიდა, რომელსაც 52 მანდატი ერგო.