დღეს საქართველოს მასშტაბით სრული მობილიზაცია აქვთ გამოცხადებული. ვნახოთ, რამდენ ადამიანს სჯერა, რომ გაყალბდა 300 000 ხმა ამ ქვეყანაში. რამდენად არასერიოზულია ამაზე ლაპარაკი და რამდენს ადამიანს დააჯერებენ ამას, მართლა საინტერესოა, – განაცხადა „ქართული ოცნების“ აღმასრულებელმა მდივანმა, საპარლამენტო უმრავლესობის ლიდერმა და ფრაქცია „ქართული ოცნების“ თავმჯდომარე მამუკა მდინარაძემ.
მისი თქმით, ოპოზიციას თავმოყვარეობა არ აქვს, როდესაც საზოგადოებას ისეთ ტყუილს კადრებს, როგორიცაა საუბარი 300 000 ხმის გაყალბებაზე.
„მერე დაიწყებენ ხვეწნას, რომ პარლამენტში შემოვიდნენ. ერთხელ და სამუდამოდ ეს ვაჭრობა – პარლამენტში შემოვალ-არ შემოვალ, უნდა დასრულდეს. უნდა მიხვდნენ, რომ დამარცხებულმა უნდა აღიაროს არჩევნების შედეგები და გადატრიალება-ამოტრიალებაზე და რაღაც სისულელეებზე არ უნდა იფიქრონ. ისეთი უთავმოყვარეოები არიან, ყველანი შემოვლენ. თუ თავმოყვარეობა გააჩნიათ არ უნდა შემოვიდნენ, მაგრამ შემოვლენ, რადგან თავმოყვარეობა რომ ჰქონოდათ, ხალხისთვის ის ტყუილი არ უნდა ეკადრებინათ, რასაც 300 000-ხმიანი გაყალბება ჰქვია. მტკიცებულების მაგვარი, არაფერი გააჩნიათ. როგორც კანონია რუსული, ასე, ამ ლოგიკით მოქმედებენ ისინი. ჩვენ უნდა უზრუნველყოთ რომ ამ ქვეყანაში ტყუილები ვეღარ შეასაღონ ადამიანებს. არ შეიძლება სერიოზულად ელაპარაკო ადამიანს, რომ 300 000 ხმა გაყალბდა. მე რომ ვიღაცამ ასეთი რამ მკადროს თავს შეურაცხყოფილად ვიგრძნობ, იმიტომ რომ ტყუილსაც გააჩნია“, – განაცხადა მდინარაძემ.