„რა თქმა უნდა, ყველა, ვინც გიორგი კალანდარიშვილს, უკვე მეორედ, სახლში მიუვარდა, არის ფაშისტი. თუმცა, ეს არ არის მთავარი პრობლემა. ქართველ ფაშისტებს ქართველი ხალხი იცნობს და მიხედავს. პრობლემა იმ „ევროპელ პოლიტიკოსებშია“, ვინც რამდენიმე დღის წინ, პარლამენტთან, დამტვრეული ინგლისურით, ევროპის სახელით, ამ ფაშისტებს ძალადობისკენ უბიძგა“, – ეს არის რეალობა, რასაც შალვა პაპუაშვილი წერს.
ნათელია, გარე აქტორებისგან წახალისებული ძალადობა, რადგან ფაქტია, რომ მოხეტიალე რადიკალებს საკუთარ ქვეყანაში ნდობის სერიოზული პრობლემა აქვთ – ქუჩაში ხალხის გამოყვანასაც ვერაფრით ახერხებენ, – განაცხადა ტელეკომპანია „იმედის“ გენერალური დირექტორის მოადგილემ, გადაცემა „იმედის კვირის“ წამყვანმა, ირაკლი ჩიხლაძემ.
„შესაბამისად გარე პატრონების დავალებით 8 ქვეყნის საგარეო კომიტეტების წევრები მოავლინეს თბილისს, მუხტის ასაწევად.
გარდა იმისა რომ სხვა ქვეყნის შიდა საქმეებში ღიად ერევიან და ღიად გამოხატავენ უპატივცემულობას ქართველი ხალხის არჩევანის მიმართ, ვიხილეთ არნახული მასშტაბის შეურაცხყოფა.
მეგობრობის რა გითხრათ მაგრამ ოპოზიციის დესანტი ე.წ მეგობრად მოსული ნამდვილად ვნახეთ რუსთაველზე. სხვათა შორის სოციალურ ქსელებში დიდი პროტესტი მოჰყვა რადიკალების შავ ორშაბათს: „რანაირი ოპოზიცია არ გვახსოვს ამ ქვეყანაში მაგრამ ასეთი სამარცხვინო არა“, „ყალბი ემოცია“, „ქვეყნის გამყიდველები“, „საბჭოთა კავშირის ნოსტალგიით შეპყრობილები“, „სხვაზე დამონების მცდელობის მასტერკლასი“.
უამრავი შინაარსის შეფასება წავიკითხე… სამწუხარო რეალობაა – ეს არის ტრაგედია, როცა შენს ქვეყანას არ სცემ პატივს და მზად ხარ სხვა ქვეყნის პოლიტიკოსებს მისცე სამშობლოს დატუქსვის უფლება იმ ადგილიდან, სადაც სამი ათეული წლის წინ სწორედ დამოუკიდებლობისთვის დაღვარეს სისხლი ჩვენმა გმირებმა, თავისუფლებისთვის და არა სხვაზე დამოკიდებულებისთვის.
ერთია რას ვხედავთ და მეორეა რას გვეუბნებიან. უცხო ქვეყნების საგარეო კომიტეტების წარმომადგენლებმა ხომ დაგვიბარეს მიშა გამოუშვითო და შემდეგ ისიც გვითხრეს რომ დემოკრატიული უკუსვლით შეშფოთებული ევროპარლამენტარები საგანგებოდ შეიკრიბებიან და წითელი ბარათიც არ დააყოვნებსო.
ნამდვილად შეიკრიბნენ და რვაასკაციან დარბაზში ოცამდე დეპუტატიც ვიხილეთ – ძალიან შთამბეჭდავი სანახავი იყო საქართველოზე დებატების დროს ევროპარლამენტის ცარიელი დარბაზი.
ე.წ მეგობრების შანტაჟის პოლიტიკა – ნახეთ ცოტნე გეგეჭკორის სპეციალურ რეპორტაჟში“, – აღნიშნა ირაკლი ჩიხლაძემ.