მათი მიზანია, რომ ბოლო კვირის განმავლობაში მოვლენების მაქსიმალური ესკალაცია მოახდინონ, – განაცხადა გარემოს დაცვისა და ბუნებრივი რესურსების საპარლამენტო კომიტეტის თავმჯდომარემ მაია ბითაძემ.
დეპუტატი გამოეხმაურა ოპოზიციის მიერ გამართულ აქციას.
„შეიძლება ითქვას, რომ ეს არის უსუსური გაკოტრებული პოლიტიკური რადიკალური კლანის ბოლო გაფართხალება. მათი მიზანია, რომ ბოლო კვირის განმავლობაში მოვლენების მაქსიმალური ესკალაცია მოახდინონ ერთი მარტივი მიზნით, რომ მეტი უარყოფითი შეფასება მიიღოს საქართველომ ევროკავშირისგან. ეს კიდევ ერთხელ გვანახებს, თუ რაოდენ ბოროტი და მოღალატეობრივია ის ძალა, რასაც ჩვენ რადიკალურ ოპოზიციას ვეძახით“, – აღნიშნა ბითაძემ.
„ნაციონალურის მოძრაობისა“ და „კოალიცია ცვლილებებისთვის“ ლიდერებმა გუშინ 24-საათიანი აქცია დააანონსეს. ზოგიერთმა მათგანმა აქციის მონაწილეებთან ერთად, ღამე თბილისის სახელმწიფო უნივერსიტეტის პირველი კორპუსის მიმდებარედ გაშლილ კარვებში გაათენეს.
პროტესტის მონაწილეებმა კარვებით და სამარშრუტო ტაქსებით ჭავჭავაძის გამზირი ჩახერგეს, რის გამოც ვაკე ამ დრომდე პარალიზებულია.