გიცხადებთ მხარდაჭერას და ამ მხარდაჭერას კონკრეტული საფუძვლები გააჩნია. ვიდრე ჩვენ დღევანდელ დღემდე მოვიდოდით ბევრი პატარ-პატარა ბრძოლა გადავიტანეთ და საერთო ჯამში ჩვენ გვიწევს ომზე ლაპარაკი, რომელიც მშვიდობით უნდა მოვიგოთ, – განაცხადა საპარლამენტო უმრავლესობის ლიდერმა, ფრაქცია „ქართული ოცნების“ თავმჯდომარემ და პარტიის აღმასრულებელმა მდივანმა მამუკა მდინარაძემ.
მისი თქმით, 26 ოქტომბრის არჩევნები იყო რეფერენდუმი საქართველოს ეროვნულ ინტერესებს და გარე ინტერესებს შორის. მამუკა მდინარაძის განცხადებით, მორიგ ჯერზე გაიმარჯვა ეროვნულმა ინტერესებმა.
„მაგრამ ეს ჩვენ დამშვიდების საშუალებას არ გვაძლევს, რადგან ეს ომი გრძელდება. არავის ჩაუქნევია ხელი იმაზე, რომ გარე ინტერესები იყოს მძლავრად წარმოდგენილი ამ ქვეყანაში. საქართველოს ყველა მოქალაქემ უნდა იცოდეს, რომ ამ ომში საბოლოოდ გამარჯვებას ვერ მივაღწევთ თუ ოდნავ მაინც მოვდუნდებით“, – განაცხადა მამუკა მდინარაძემ.
მისი თქმით, გარე ძალების წარმომადგენლებისთვის აფხაზი და ოსი მტერია და ეროვნული საქმე რუსულია.
„მათთვის ჯაშუშობა და გარედა მართვა ნიშნავს დემოკრატიას. მათთვის მოსწავლეებში არატრადიციული ცხოვრების პროპაგანდა ნიშნავს ბავშვთა ინფორმირებულობას. მათთვის მამის დამჭრელი და პოლიციელის ცოცხლად დაწვის ავტორი არის გმირი. მათთვის დეზინფორმაცია და სიძულვილი არის ცხოვრების წესი.
თუ რუსეთს ჩვენი ტერიტორიების 20% აქვს ოკუპირებული, ისინი ცდილობენ ოკუპაცია გაუკეთონ ადამიანის ტვინებს და დააჯერონ, რომ გამჭვირვალობა არის რუსული საქმე. რომ საპატრიარქოს წარმომადგენლები არიან… არ გავიმეორებ იმ სიტყვებს. თურმე გვარამია მაგარი და მართალი კაცია, ხოშტარია რუსეთს ვერ იტანს, ხაზარაძე მოწყალე და გახარია უღალატო ადამიანია. სააკაშვილი დემოკრატიის შუქურა. აჯერებენ საზოგადოებას რომ ელექტრონულ არჩევნებზე 300 ათასი ხმა გაყალბდა და ამის შესახებ თენგო გვეტყვის ყველაფერს ხვალ არა და ზეგ. მათ შურთ უკრაინის მდგომარეობის და არ მალავენ იმასაც, რომ საფეხბურთო მატჩში საქართველოს წინააღმდეგ უკრაინის მხარეს არიან“, – განაცხადა მამუკა მდინარაძემ.
84 მომხრე, 0 წინააღმდეგი, პარლამენტმა მთავრობის შემადგენლობას ნდობა გამოუცხადა.