მექსიკის პრეზიდენტის, კლაუდია შაიბაუმის განცხადებით, დონალდ ტრამპთან საუბრისას საიმპორტო ტარიფების საკითხი არ განუხილავთ. როგორც მექსიკის პრეზიდენტმა პრესკონფერენციაზე განმარტა, მათ არალეგალურ მიგრაციასა და ნარკოტიკულ საშუალებებზე ისაუბრეს. შაიბაუმის თქმით, მომავალში ისინი ასევე განიხილავენ იარაღის შედინების საკითხს.
„ტრამპმა წამოჭრა მიგრაციისა და ფენტანილის საკითხები, ანუ ორი საკითხი, რომელიც მას აწუხებს და რაც იყო არგუმენტი ტარიფების დასაწესებლად. ჩვენ კონკრეტულად ტარიფებზე არ გვისაუბრია, არამედ ვისაუბრეთ იმ საკითხებზე, რომლებიც მას აინტერესებდა. ეს იყო ძალიან მეგობრული საუბარი“, – აღნიშნა მექსიკის პრეზიდენტმა.
ამასთან, მექსიკის პრეზიდენტი გამოეხმაურა ტრამპის განცხადებას, სადაც ის ამბობს, რომ მექსიკის პრეზიდენტი დათანხმდა, შეაჩეროს მიგრაცია აშშ-ში თავისი ქვეყნის გავლით და ეფექტურად დახუროს სამხრეთის საზღვარი.
მექსიკის პრეზიდენტის განცხადებით, მექსიკის პოზიციაა არა საზღვრების დახურვა, არამედ მიგრაციის პრობლემის მოგვარება ადამიანების უფლებების დაცვით. კლაუდია შაიბაუმის თქმით, მან დონალდ ტრამპს სთხოვა, კუბისა და ვენესუელის წინააღმდეგ „ბლოკადის“ შეწყვეტა, რადგან ეს „ხალხს ტანჯავს“ და მიგრაციის ერთ-ერთი მიზეზი ხდება.
მექსიკისა და აშშ-ის სავაჭრო ურთიერთობები განსაკუთრებით მნიშვნელოვანია, რადგან ისინი ერთმანეთის უმსხვილესი სავაჭრო პარტნიორები არიან.
ცნობისთვის, მანამდე აშშ-ის არჩეულმა პრეზიდენტმა, დონალდ ტრამპმა განაცხადა, რომ მისი პრეზიდენტობის პირველივე დღიდან მკვეთრად გაზრდის ტარიფებს მექსიკიდან, კანადიდან და ჩინეთიდან შემოტანილ საქონელზე. ტრამპის განცხადებით, ეს ნაბიჯი წარმოადგენს საპასუხო ზომას არალეგალურ იმიგრაციასა და საზღვარზე „დანაშაულისა და ნარკოტიკების“ შემოდინებაზე.