არავის აქვს უფლება, პოლიციელთან მივიდეს, შეაგინოს, შეაფურთხოს, ბოთლები ესროლოს, ქვები ესროლოს, – ამის შესახებ თბილისის მერმა, კახა კალაძემ განაცხადა.
კალაძის თქმით, მსგავს ქმედებებს ყოველთვის შესაბამისი რეაგირება მოჰყვება.
„შსს-ს თანამშრომლები იცავენ წესრიგს და უზრუნველყოფენ ადამიანების უსაფრთხოებას. არავის აქვს უფლება, პოლიციელთან მივიდეს, შეაგინოს, შეაფურთხოს, ბოთლები ესროლოს, ქვები ესროლოს. არავის არ აქვს ამის უფლება. ამას ყოველთვის მოჰყვება შესაბამისი რეაგირება. აბა, გაბედეთ და ევროპის რომელიმე ქვეყანაში, ნებისმიერ ქვეყანაში, თუნდაც ამერიკაში პოლიციელს ვინმე დაელაპარაკოს ისე, როგორც გუშინ ზოგიერთი აქციის მონაწილე აკეთებდა. ნახეთ, უბრალოდ რას უზამენ, ძვლებში დაამტვრევენ. ჟურნალისტი არ ნიშნავს იმას, რომ ყველაფერი იკადრო და ვიღაცებს მიაყენოთ შეურაცხყოფა“, – განაცხადა კალაძემ.
როგორც დედაქალაქის მერმა აღნიშნა, სიტყვის და გამოხატვის თავისუფლება ქვეყანაში დაცულია.
„ყველას აქვს უფლება, გამოხატოს პროტესტი სხვადასხვა ფორმით, მაგრამ ეს უნდა იყოს კანონის ფარგლებში. ვინც არ უნდა იყოს ჟურნალისტი, ბიზნესმენი, თუნდაც პოლიტიკოსი. ამას ყოველთვის მოჰყვება შესაბამისი რეაგირება. მშვიდობიან პროტესტს არ აქვს არანაირი პრობლემა, მაგრამ, როგორც კი ჩნდება ადამიანი, ვინც შეურაცხყოფას აყენებს პოლიციას, აგინებს, ესვრის ბოთლებს, ქვებს, როგორ ფიქრობთ, ეს დარჩება რეაგირების გარეშე?! ჩვენ ვცხოვრობთ ქვეყანაში, სადაც სიტყვის და გამოხატვის თავისუფლება არის დაცული. რა თქმა უნდა, ამას აქვს თავისი ჩარჩოები, არსებობს კანონი. როგორც კი გავცდებით ამას, ყველაფერს მოჰყვება შესაბამისი რეაგირება. გამოხატვის თავისუფლება არ ნიშნავს, რომ პოლიციელს მიაყენო შეურაცხყოფა. უამრავი კადრი არსებობს. არ დარჩება პასუხგაუცემელი არცერთი გადაცდომა. თქვენ არ იფიქროთ, რომ დღეს შევარდნაძის დროინდელი ხელისუფლებაა. დღეს საქართველოს ჰყავს ხელისუფლება, რომელიც იცავს კანონს, ადამიანის უფლებებს, სიტყვის და გამოხატვის თავისუფლებას, მაგრამ ეს არ ნიშნავს, რომ პოლიციელს შეურაცხყოფა მიაყენო. ასე არ გამოვა, მეგობრებო. ყველაფერს აქვს საზღვარი. არის კანონი, გინდა პროტესტი? გამოხატე, მაგრამ კეთილი ინებე და ეს გააკეთე კანონის ფარგლებში“, – აღნიშნა კალაძემ.