ყოველთვის ვაკეთებთ ყველაფერს, რათა აქციის თითოეული მონაწილის, ჟურნალისტის უსაფრთხოება იყოს დაცული, თუმცა, როცა აქცია იღებს ძალადობრივ ხასიათს, იზრდება დაშავების რისკები, – განაცხადა შინაგან საქმეთა მინისტრის მოადგილე ალექსანდრე დარახველიძემ რუსთაველის გამზირზე გამართულ აქციაზე დაშავებული ჟურნალისტების შესახებ დასმული კითხვის პასუხად.
„რამდენიმე ჟურნალისტი არის დაშავებული, თუმცა იმასაც აღვნიშნავ, რომ პოლიციელებიც და აქციის მონაწილეებიც არიან დაშავებული. ამიტომ, ძალადობრივი ხასიათის მქონე აქცია არის ძალიან მაღალი საფრთხის შემცველი. მიზანმიმართულ მოქმედებას არავინ აპირებდა, მაგრამ იყო გარკვეული შემთხვევები, როდესაც მოხდა დაზიანება. მოვუწოდებთ კიდევ ერთხელ ყველა მონაწილეს, რომ არ გასცდნენ მშვიდობიანი შეკრების ფარგლებს.
რაც შეეხება ზოგადად რეკომენდაციას, ასეთ დროს საერთაშორისო სტანდარტი და მოთხოვნა არის ის, რომ მაქსიმალურად დაცული იყოს გაშუქების მიზნით მყოფი მასმედიის წარმომადგენლის უსაფრთხოება, მათ ჰქონდეთ შესაბამისი ამოსაცნობი ნიშნები, რათა დროულად მოხდეს რეაგირება ნებისმიერ თავდასხმაზე, რომელიც შეიძლება, მომდინარეობდეს მათ შორის აქციის მონაწილეების მხრიდანაც. რა თქმა უნდა, ამ კონკრეტულ შემთხვევაში არ ვგულისხმობ, ზოგადად რეკომენდაციას ვგულისხმობ. ასე რომ, ამ კუთხით მუშაობა ვფიქრობ, გასაგრძელებელია“, – აღნიშნა დარახველიძემ.