„იმედზე“ რასაც აკეთებდნენ, ახლა ამის გამეორება სხვა ფორმით საზოგადოებრივ მაუწყებელში უნდოდათ. დიდი ფარსია, როცა კეზერაშვილის არხის თანამშრომლები ამბობენ, რომ დემოკრატიის გულშემატკივრები არიან, – ამის შესახებ პარლამენტის ადამიანის უფლებათა დაცვის კომიტეტის თავმჯდომარემ, რატი იონათამიშვილმა განაცხადა.
ამასთან, იონათამიშვილი საქართველოს პირველი არხის ჟურნალისტის, სალომე ქოქიაშვილისადმი დაპირისპირებასაც გამოეხმაურა.
„ფაქტობრივად, „ნაცმოძრაობას“ 7 ნოემბრის რემეიქის მცდელობა ჰქონდათ, რაც არ გამოუვიდათ. მაშინ „იმედზე“ რასაც აკეთებდნენ, ახლა ამის გამეორება სხვა ფორმით საზოგადოებრივ მაუწყებელში უნდოდათ. ლიბერალური ფაშიზმის გამოვლინებაა, როცა განსხვავებულ აზრს აგრესიულად ესხმიან თავს. ეს არის რადიკალური ოპოზიციის სახე. ყველაფერს რომ თავი დავანებოთ, დიდი ფარსია, როცა კეზერაშვილის არხის თანამშრომლები ამბობენ, რომ დემოკრატიის გულშემატკივრები არიან. მათ დემოკრატიასთან არანაირი საერთო არ აქვთ, მისტერ ოფშორთან აქვთ დიდი საერთო. სალომე ქოქიაშვილის მიმართ ადგილი ჰქონდა პროფესიულ საქმიანობაში ხელშეშლას. მასზე აგრესიული თავდასხმა მოხდა, რასაც აგრესიული ხასიათი ჰქონდა და ეს ძალადობის ნიშნებსაც შეიცავდა. ამაზე გამოხმაურება არ ყოფილა ე.წ. უფლებადამცველების მხრიდან. დიპლომატებს მოვუწოდებ, ეს ყველაფერი შეაფასონ, რადგან ვხედავთ, რომ თავდასხმები სისტემურ ხასიათს იღებს“, – განაცხადა რატი იონათამიშვილმა.
საქართველოს პირველ არხთან გამართულ აქციაზე „ფორმულას“ ჟურნალისტი ირაკლი ტაბლიაშვილი და ნინია კაკაბაძე პირველი არხის ჟურნალისტს, სალომე ქოქიაშვილს დაუპირისპირდნენ. ტელევიზიის შენობასთან მომხდარ ინციდენტთან დაკავშირებით, პირველმა არხმა საქართველოში აკრედიტებული დიპლომატიური კორპუსისა და საერთაშორისო ორგანიზაციების წარმომადგენლებს მიმართა: „პირველი არხის ჟურნალისტები განიცდიან არნახულ ზეწოლას, განსაკუთრებით მიზანმიმართულად და პროვოკაციულად მოქმედებენ ცალკეული ტელევიზიების წარმომადგენლები და არ გვეძლევა მუშაობის საშუალება. კატეგორიულად მოვითხოვთ, მოგვეცეს ჩვენი პროფესიული საქმიანობის შესრულების შესაძლებლობა“.