ნატო-ს გენერალური მდივნის, მარკ რუტეს განცხადებით, უკრაინის გაწევრიანების პერსპექტივებთან დაკავშირებით ალიანსის პოზიცია უცვლელია.
ამის შესახებ მარკ რუტემ ბრიუსელში ბრიფინგზე განაცხადა.
„პარტნიორები თანხმდებიან, რომ უკრაინის მომავალი ნატოშია“, – განაცხადა რუტემ და აღნიშნა, რომ, ნატო-ს ვაშინგტონის სამიტის გადაწყვეტილების შესაბამისად, პარტნიორები წევრობისკენ ხიდს ავითარებენ.
თუმცა, მისი თქმით, მინისტერიალზე, რომელიც დღეს გაიხსნება, ამ თემაზე დისკუსიები მოსალოდნელი არ არის.
როგორც მარკ რუტემ თქვა, ალიანსი უკრაინის სამხედრო დახმარებაზე ფოკუსირებას გეგმავს.
„მომდევნო დღეებში კონცენტრირებული ვიქნებით იმაზე, თუ რა გავაკეთოთ უკრაინის დასახმარებლად. შეხვედრა იმაზე იქნება ფოკუსირებული, რომ როდესაც უკრაინა გადაწყვეტს რუსეთთან მოლაპარაკებების დაწყებას, ეს შეძლოს, ძლიერი პოზიციიდან გააკეთოს“, – განაცხადა მარკ რუტემ.
მისი თქმით, ახლა უკრაინას უფრო სამხედრო დახმარება სჭირდება, ვიდრე მოლაპარაკებები იმის თაობაზე, თუ როგორი უნდა იყოს მშვიდობა.