უკრაინის საგარეო საქმეთა მინისტრმა, ანდრიი სიბიგამ განაცხადა, რომ უკრაინა ომის დროს არ ითხოვს ნატოში გაწევრიანებას, თუმცა ალიანსში გაწევრიანება მისი სტრატეგიული მიზანია. ინფორმაციას ამის შესახებ უკრაინული მედია ავრცელებს.
„ჩვენ ვართ ქვეყანა, რომლის წინააღმდეგაც რუსული აგრესია მიმდინარეობს და მართლაც რთულია ქვეყნის ნატოში გაწევრიანების შესაძლებლობაზე საუბარი, როცა მის ტერიტორიაზე სამხედრო ოპერაციები მიმდინარეობს. ეს არის ნატოს ცალკეული წევრების პოზიცია, რომლებიც თვლიან, რომ ამან შეიძლება გამოიწვიოს მათი უშუალო მონაწილეობა ომში. მაგრამ უკრაინა ამისკენ არ ისწრაფვის“, – აღნიშნა უკრაინის საგარეო უწყების ხელმძღვანელმა.
ამასთან, მან ხაზგასმით აღნიშნა, რომ კიევის პრინციპული პოზიცია გაწევრიანებასთან დაკავშირებით უცვლელი რჩება – „უკრაინა ნატოში გაწევრიანებას უსაფრთხოების ერთადერთ შესაძლო გარანტიად მიიჩნევს და ეს არის მისი სტრატეგიული მიზანი“.