დღეს სტრასბურგის სასამართლომ თქვა ის, რაც ქართული საზოგადოებისთვის ისედაც ცნობილი იყო, უბრალოდ დღეს უკვე ჩვენ უმაღლესი ევროპული ტრიბუნიდან, უმაღლესი ევროპული სტანდარტის დასაბუთებით მოვისმინეთ, რომ დავით კეზერაშვილი არის სისხლის სამართლის დამნაშავე, მას ქართული ჯარის წინაშე აქვს ჩადენილი განსაკუთრებით მძიმე დანაშაული და ფაქტობრივად მან, შეიძლება ითქვას გაძარცვა ქართული ჯარი, – განაცხადა იუსტიციის მინისტრის მოადგილემ ბექა ძამაშვილმა გადაცემაში „დღის ქრონიკა“.
„ამ კონკრეტულ საქმეში საუბარია არის 2008 წელზე, ეს არის პერიოდი 2008 წლის ომამდე მცირე ხნით ადრე, მაშინ, როდესაც ქართული ჯარი უნდა ყოფილიყო განსაკუთრებით შემზადებული, მაღალი სტანდარტებით მომზადებული და გაწვრთნილი. ამ პერიოდში ხდება ისე, რომ დავით კეზერაშვილი ოფშორულ კომპანიასთან აფორმებს ხელშეკრულებას ყოველგვარი წესების დარღვევით და დაახლოებით 15 მილიონ ლარამდე, მაშინდელი 5 მილიონი ევროს ოდენობით, სახელმწიფო ბიუჯეტიდან ჯარისთვის განკუთვნილი თანხები ასე უმისამართოდ, ოფშორულ კომპანიებში იგზავნება ისე, რომ არც წვრთნა ჩატარებულა, არც სამხედროებს გაუგიათ რაიმე ამის შესახებ და არც მიღება – ჩაბარების აქტი გაფორმებულა.
ამ საკითხთან დაკავშირებით ბუნებრივია მოჰყვა რეაგირება ქართული სამართალდამცავი სისტემის მხრიდან და 2021 წელს საქართველოს უზენაესმა სასამართლომ დავით კეზერაშვილი ცნო სისხლის სამართლის დამნაშავედ, თუმცა როგორც ხდება ხოლმე ჩაირთო შემდეგ პროპაგანდის მანქანა, თითქოს ის არ ყოფილა დამნაშავე, პოლიტიკური კუთხით იდევნებოდა და ა.შ.
დღეს უკვე ევროპულმა სასამართლომ წერტილი დაუსვა ამ პროპაგანდას და თქვა, რომ დიახ, დავით კეზერაშვილმა ჩაიდინა დანაშაული, არანაირ პოლიტიკურ დევნას ადგილი არ ჰქონია, არც უდანაშაულობის პრეზუმფცია დარღვეულა და შეიძლება შეაჯამოთ ეს გადაწყვეტილება ისე, რომ ქართულმა სასამართლომ უმაღლესი ევროპული სტანდარტებით წარმართა მართლმსაჯულება დავით კეზერაშვილის წინააღმდეგ“, – აღნიშნა ბექა ძამაშვილმა.