ღაზის სექტორში, ნუსეირათის ლტოლვილთა ბანაკზე ისრაელის თავდასხმას 20 ადამიანი ემსხვერპლა.
ადგილობრივი საინფორმაციო სააგენტოების ინფორმაციით, ავიაიერიში საცხოვრებელ სახლზე განხორციელდა. მსხვერპლთა შორის არიან ბავშვები და ქალები. დაშავებულია, სულ მცირე, 30 ადამიანი.
ვრცელდება ინფორმაცია, რომ აღნიშნულ ტერიტორიაზე ასევე განხორციელდა საარტილერიო დაბომბვა.
ღაზის სამოქალაქო თავდაცვის სააგენტოს ცნობით, არაბული ანკლავის ჩრდილოეთში, კამალ ადვანის საავადმყოფოს მახლობლად ისრაელის თავდასხმების შედეგად 29 ადამიანი დაიღუპა. ისრაელში არ ადასტურებენ კამალ ადვანის საავადმყოფოზე თავდასხმას.
პარალელურად, საერთაშორისო შუამავლებმა განაახლეს მოლაპარაკება „ჰამასსა“ და ისრაელთან ღაზაში ცეცხლის შეწყვეტის შესახებ.
გერმანიის საგარეო საქმეთა სამინისტროს წარმომადგენელმა ჟურნალისტებს განუცხადა, რომ ბერლინი უარყოფს „ამნესთი ინთერნეიშენალის“ ანგარიშს იმის შესახებ, რომ ისრაელი ახორციელებს გენოციდს ღაზაში.