ზურაბიშვილი თუ ჩათვლის საჭიროდ, რომ, სხვა ყველაფერთან ერთად, სააკაშვილს მიბაძოს და თავისი ადმინისტრაციის შენობის სახურავზე აძვრება, როგორც სააკაშვილი აძვრა კიევში, როცა აპატიმრებდენ, ძალიან კარგი სანახავი იქნება, – ამის შესახებ „ხალხის ძალის“ წევრმა, გურამ მაჭარაშვილმა განაცხადა.
მისი თქმით, სალომე ზურაბიშვილმა აშკარად გაყიდა სკამი და ახლა იმიტომ ჩაებღაუჭება, რომ უღირს პრეზიდენტის სკამზე ჯდომა.
„წინასაახალწლოდ კომედიური ჟანრის რაღაც ფილმებსაც დავდგამთ. სხვა რეალური მოლოდინი არ უნდა არსებობდეს. სულ მცირე, არასერიოზულია ახლა, რომ სერიოზული კომენტარები გავაკეთოთ სალომე ზურაბიშვილის ფეხების გაფშეკაზე, რომ ის არ გამოვა და ჩაებღაუჭება იმ სკამს, რომელი სკამიც გაყიდა. რამდენ მილიონად თუ რაზე გაყიდა, ჩვენთვის ეს მნიშვნელოვანი არ არის. მთავარია, რომ მან აშკარად გაყიდა ეს სკამი და ახლა ალბათ იმიტომ ჩაებღაუჭება, რომ უღირს პრეზიდენტის სკამზე ჯდომა, რათა ემსახუროს უცხოურ ძალებს საქართველოს საწინააღმდეგოდ, რომელსაც ვადა 29 დეკემბერს გაუვა. ამ მარგინალურ ძალას, რასაც „ნაცმოძრაობა“ ჰქვია, არავითარი გეგმები არ ჰქონია და არც ექნება. ისინი მოქმედებენ თავიანთი უცხოელი პატრონების მითითებებით, რომლებსაც ასევე, თავის მხრივ, უკვე გეგმები აღარ აქვთ“, – განაცხადა მაჭარაშვილმა.
გურამ მაჭარაშვილის განცხადებით, მსოფლიოში რეალობა უკვე შეიცვალა, აღქმების დრო მიდის და რეალობის დრო მოდის.
„აქედან გამომდინარეობს, რომ არც 29 დეკემბრამდე და არც 29 დეკემბრის შემდგომ საქართველოში არავითარი სერიოზული მოვლენები არ და ვერ განვითარდება, საქართველოს საზოგადოების უმრავლესობის გადაწყვეტილებიდან გამომდინარე, რომ მას სურს მშვიდობა, ტრადიციების შენარჩუნება. ქართველ ხალხს სურს თანამედროვე, ცივილიზებულ სამყაროში ჩაჯდეს საქართველო ღირსეულად, ორ ფეხზე მდგარი, როგორც დამოუკიდებელი ქვეყანა“, – აღნიშნა მაჭარაშვილმა.