ტელეწამყვანი მაკა რაზმაძე სოციალურ ქსელში წერს:
“მოკლედ, ვისაც არ დაეზარა ყველამ “მიგვტუქსა” თბილისელები იმის გამო, რაც არც კი გვიფიქრია. თვითონვე იფიქრეს, თვითონვე შეამჩნიეს და თვითონვე გადაწყვიტეს -“ალბათ ამაზე ასე იტყვიანო” და წავიდაა სტატუსები…. არადა, გულწრფელად გეტყვით, მართლა არც მიფიქრია, რომ დაცლილი დედაქალაქი უფრო ლამაზია, ვიდრე ხალხით სავსე. არც მიფიქრია, რომ კარგი იქნება ოჯახის წევრების სასაფლაოზე რაიონში წასული ადამიანი, რომ აღარ უნდა დაბრუნდეს და აღარ მოიპოვოს საარსებო ისეთივე საკუთარ დედაქალაქში, როგორიც ჩემია. არც ის მიფიქრია, რომ გამოყრუებულ ქუჩებში სიარული მირჩევნია სიცოცხლით სავსეს და თუნდაც გადატვირთულს. რომ ეს მძიმე მდუმარება სჯობს ჟივილ-ხივილიანს და თუნდაც ზედმეტად ხმაურიანს.
მე თბილისელი ვარ, აქ დავიბადე, გავიზარდე და ზუსტად ამ ქალაქმა მასწავლა, რომ ის ყველასია, ის ყველას ერთნაირად გვეკუთვნის, და ამ ქალაქმა მასწავლა, რომ არასდროს მოვექცე რაიონიდან ჩამოსულ ჩემს თანამემამულეებს ისე, თითქოს მათზე მეტად მეკუთვნის აქ ყოფნა.
ზუსტად თბილისელებმა ვიცით ეს დაუწერელი წესები და როცა აქ ჩამოდიხართ ზოგიერთები, აჯობებს თქვენც ისწავლოთ, რომ აღარასროს გამოთქვთ ჩვენს ნაცვლად ის სისულელეები, რასაც ახლა ან რომელიმე სხვა დღესასწაულზე ვკითხულობთ ხოლმე, თბილისელები ჩვენი სახელით დაწერილს, მაგრამ ჩვენს განწყობებთან არანაირ კავშირში მყოფს.
ნახევარზე მეტი საქართველო ისედაც დაცლილია.
უცხოეთშია გადახვეწილი თითქმის ყველა ოჯახიდან რამდენიმე ადამიანი, და მათზე რომ ვინმემ იქ, იმ ქვეყნებში, სადაც თავის გატანას ცდილობენ, მსგავსი თქვან – წავიდნენ საკუთარ სახლებშიო… სანამ ვინმეზე ამას გავიფიქრებ, ჯერ ისინი გამახსენდება. თუმცა, ისედაც არ გავიფიქრებ და არც მიფიქრია არასდროს.
და ამის ფონზე ვინ და რომელი თბილისელი იტყვის ვინმეზე – წავიდესო… მე არ ვიცნობ ასეთებს! თქვენ?”, – წერს რაზმაძე.