არჩევნების შედეგად ხელისუფლებაში რომ ვერ მოვიდნენ, ამას აპროტესტებენ, მაგრამ არჩევნების შედეგად ფულის აღება ძალიან კარგად უნდათ, – განაცხადა იურიდიულ საკითხთა საპარლამენტო კომიტეტის თავმჯდომარემ არჩილ გორდულაძემ „დღის ქრონიკაში“.
მან ვრცლად ისაუბრა იმ წესზე, რომელიც პოლიტიკური პარტიების საბიუჯეტო დაფინანსებას განსაზღვრავს და ბარიერგადალახული სამი ოპოზიციური პარტიის მიერ არჩევნების შედეგებიდან გამომდინარე დაფინანსებაზე უარის ართქმა შეაფასა.
„ეს არის ერთი შეხედვით უმეცრება და მეორეს მხრივ პირდაპირი ტყუილი, რომ თითქოს, კავშირი არ აქვს არჩევნების შედეგებს და დაფინანსების აღებას არჩევნების შედეგებიდან გამომდინარე და პარტიების დაფინანსების წყაროს გაჩენას ზოგადად. რა წერია კანონში – „მოქალაქეთა პოლიტიკური გაერთიანების შესახებ კანონი“ განსაზღვრავს წესს, რომლის მიხედვითაც პარტიას ერიცხება საბიუჯეტო დაფინანსება. ეს პირდაპირ არის დაკავშირებული არჩევნების შედეგებთან, მიღებულ ხმებთან, თითოეული ხმა პირდაპირ ტრანსფორმირდება კონკრეტულ თანხაში, რის საბოლოო ჯამიც მიეცემა პოლიტიკურ გაერთიანებას საბიუჯეტო დაფინანსების სახით.
აქვე განსაზღვრულია კანონმდებლობითაც, რომ პარტიებს მიეცემათ გარკვეული დრო იმისათვის, რომ უარი თქვან სახელმწიფო დაფინანსებაზე და ასეთი რამ მოხდა კიდეც – „ნაცკლასტერში“ შემავალმა ერთ-ერთმა პარტიამ, „ახალმა“ და როგორც ლევან მაჭავარიანს უყვარს ხოლმე თქმა, „ახალთ ახალმა ნაცებმა“ისარგებლეს ამ შესაძლებლობით და უარი თქვეს ამ დაფინანსებაზე. მაგრამ სხვა დანარჩენებს უარი არ უთქვამთ და მშვენივრად მიიღებენ ამ დაფინანსებას, თუ უკვე არ მიიღეს, ეს ცენტრალურ საარჩევნო კომისიას და ამ პარტიებს უფრო ეცოდინებათ, რომელიც კანონით გათვალისწინებულია და რომელიც დაკავშირებულია არჩევნებთან, არჩევნების შედეგებთან, მიღებულ ხმებთან.
კიდევ ერთხელ ხაზგასმით გამოჩნდა, რომ ამ ადამიანებმა რეალურად ძალიან კარგად იციან, რომ არჩევნები შედგა, არჩევნები ჩატარდა კანონმდებლობის დაცვით, არავითარი კითხვის ნიშნები არჩევნების შედეგებზე არ არსებობს, პარლამენტი არის ლეგიტიმური. ეს ყველაფერი რომ არ იყოს, მაშინ მათ მიერ საბიუჯეტო დაფინანსების მიღებაც არალეგიტიმური იქნებოდა, მაგრამ ეს არ უთქვამთ. მათ ძალიან კარგადაც უნდოდათ ის მილიონ ლარზე მეტი, გარდა იმ პარტიებისა, რომლებმაც ბარიერი ვერ გადალახეს, მაგრამ 1% ნამდვილად აიღეს, ბარიერგადალახულ პარტიებს – „ლელო“, გახარიას პარტია და ძველი „ნაცები“. მათ რა თქმა უნდა, იციან, რომ არჩევნები ჩატარებულია, ლეგიტიმურია და ამ შედეგებიდან გამომდინარე არც დაფინანსებაზე არ ამბობენ უარს.
წარმოიდგინეთ, მათთვის რა არის მნიშვნელოვანი – არჩევნების შედეგად ხელისუფლებაში რომ ვერ მოვიდნენ, ამას აპროტესტებენ, მაგრამ არჩევნების შედეგად ფულის აღება ძალიან კარგად უნდათ“, – განაცხადა არჩილ გორდულაძემ.
მან აქვე აღნიშნა, რომ„ლელომ“ კიდევ ერთი ქმედებით აღიარა არჩევნების შედეგები.
„ერთი ფაქტიც არ დაგვავიწყდეს კიდევ, რომ მაგალითად, „ლელოს“ უკვე აღიარებული აქვს არჩევნების შედეგები და ბატონი სიორიძე დანიშნა ცესკოს წევრად და ამის უფლებამოსილება პარტიას მხოლოდ და მხოლოდ იმ შემთხვევაში აქვს, თუ მას წევრები ჰყავს პარლამენტში. ანუ ორ შემთხვევაში აქვთ უკვე კოლექტიურ „ნაცმოძრაობაში“ შემავალ პარტიებს არჩევნების შედეგები აღიარებული, მაგრამ მოქმედებით აღიარების მიუხედავად მშვენივრად გამოდიან და ბრტყელ-ბრტყელი ფრაზებით ცდილობენ, საზოგადოებას თვალში ნაცარი შეაყარონ“, – აღნიშნა გორდულაძემ.