პოლიციელზე თავდასხმისთვის დაკავებულ „ბათუმელებისა“ და „ნეტგაზეთის“ დამფუძნებელს, მზია ამაღლობელს ბათუმის საქალაქო სასამართლომ აღკვეთის ღონისძიების სახით პატიმრობა შეუფარდა. ადვოკატმა პაატა დიასამიძემ აღკვეთის ღონისძიების სახით გირაოს შეფარდების შუამდგომლობა დააყენა. მან მოსამართლე ნინო სახელაშვილს მიმართა, რომ 100 000-ლარიანი გირაო გამოეყენებინა.
პროკურატურა კი ამაღლობელისთვის აღკვეთის ღონისძიებად პატიმრობას ითხოვდა.
„მომეტებულად საბუთდება ბრალდებულის მხრიდან ახალი დანაშაულებრივი ქმედებების ჩადენის საფრთხე, ასევე მტკიცებულებათა განადგურების საფრთხე. სასამართლომ დაადგინა, რომ დაკმაყოფილდეს პროკურატურის შუამდგომლობა“, – განაცხადა მოსამართლემ.
წინასასამართლო სხდომა 4 მარტს, 11:00 საათზე ბათუმის საქალაქო სასამართლოში ჩაინიშნა.
„ბათუმელების“ დამფუძნებლისა და დირექტორის მზია ამაღლობელის წინააღმდეგ გამოძიება სისხლის სამართლის კოდექსის 353-ე პრიმა მუხლით მიმდინარეობს, რაც პოლიციელზე თავდასხმას გულისხმობს და 4-დან 7 წლამდე ვადით თავისუფლების აღკვეთას ითვალისწინებს.