ხვიჩა კვარაცხელიას ტრანსფერზე მოლაპარაკების დროს „ნაპოლიმ“ და „პარი სენ-ჟერმენმა“ ვიქტორ ოსიმენზეც ისაუბრეს, რომელიც მომავალ ზაფხულს, შესაძლოა, ფრანგულ გუნდს შეუერთდეს – ინფორმაციას გამოცემა La Repubblica ავრცელებს.
„კვარაცხელია და ოსიმენი პსჟ-ში, შესაძლოა, ისევ ერთად ვიხილოთ. მოლაპარაკებები უფრო და უფრო კონკრეტული ხდება. ქართველი ფრანგულ კლუბს იანვარში შეუერთდება, ხოლო ნიგერიელი თავდამსხმელი – სავარაუდოდ, ზაფხულში.
საქმე ისაა, რომ პსჟ-სა და „ნაპოლის“ შორის გამართული მოლაპარაკებების დროს ნიგერიელი თავდამსხმლის საფრანგეთში შესაძლო ტრანსფერზეც ისაუბრეს. როგორც ჩანს, სეზონის ბოლოს იტალიის ჩემპიონატის „ოქროს“ დუეტი საფრანგეთში მალე ისევ გაერთიანდება.
ამ ორი ფეხბურთელის შეძენა პარიზელებს გასულ ივლისშიც სურდათ და დე ლაურენტისს ორივე მოთამაშის საფასურად 200 მილიონი ევრო შესთავაზეს. ახლა ნეაპოლური კლუბის პრეზიდენტი სავარაუდოდ, მხოლოდ 150 მილიონს მიიღებს, მაგრამ მისი ხელმძღვანელობის პერიოდში და კლუბის ისტორიაში ეს ყველაზე დიდი შემოსავალი იქნება“, – ამტკიცებს Repubblica.