ილონ მასკის კომპანიის, SpaceX-ის სატელიტური პოლიტიკის დირექტორის, სტივენ ნელსონის განცხადებით, საქართველოს რეგიონში აქვს სტრატეგიული ლოკაცია, რათა ქვეყანა ბუნებრივი ლოგისტიკური, სატრანსპორტო ჰაბი იყოს ტრანსკასპიურ სავაჭრო მაგისტრალზე, რომელიც ორ კონტინენტს ერთმანეთთან აკავშირებს.
აღნიშნულის შესახებ სტივენ ნელსონმა ინტერნეტმმართველობის გლობალურ ფორუმზე (IGF 2024), კომუნიკაციების კომისიის ორგანიზებით გამართულ სესიაზე – „რეგიონის გაძლიერება და მდგრადი ციფრული განვითარება“ განაცხადა.
„ევროპისა და აზიის გზაჯვარედინზე მდებარე ქვეყანა ბუნებრივ დამაკავშირებელ რგოლად იქცა გლობალურ აღმოსავლეთსა და დასავლეთს შორის. თავისი სტრატეგიული ლოკაციიდან გამომდინარე, საქართველო მთელი ისტორიის განმავლობაში ასრულებდა რეგიონებს შორის გამტარის როლს, დღეს კი მისი გეოგრაფიული უპირატესობა ახალ მნიშვნელობას იძენს“, – აღნიშნა სტივენ ნელსონმა.
SpaceX-ის სატელიტური პოლიტიკის დირექტორის განცხადებით, როდესაც საუბარია საქართველოს სტრატეგიულ პოზიციაზე, აუცილებელია, აღინიშნოს კომუნიკაციების კომისიის ნოვატორული როლი, როგორც ტელეკომუნიკაციების პირველი მარეგულირებელი ორგანოსი კავკასიის რეგიონში, რომელმაც Starlink-ის ლიცენზირება მოახდინა. ლიცენზირების შედეგად კი, Starlink-მა ციფრულ სერვისებზე წვდომის თვალსაზრისით არსებული გეოგრაფიული დაბრკოლებების აღმოფხვრა მოახერხა საქართველოში.
„კომუნიკაციების კომისიის აქტიურმა, პროგრესულმა მიდგომამ შექმნა ხელსაყრელი გარემო ისეთი ახალი თაობის ტექნოლოგიებისთვის, როგორიცაა Starlink-ი და ამით მთელი ქვეყნის მასშტაბით მისცა მოსახლეობას წვდომა მაღალი სიჩქარის და დაბალი დაყოვნების ინტერნეტკავშირზე. ახლა კი გაგიზიარებთ იმის მაგალითებს, როგორ ხდება კომუნიკაციების კომისიის მარეგულირებელი ხედვისა და Starlink-ის ტექნოლოგიების ერთობლიობით საქართველოში ციფრული დერეფნების შექმნა. მაღალმთიან სოფლებში, მაგალითად, სვანეთსა და თუშეთში, სადაც ტრადიციული საკომუნიკაციო ინფრასტრუქტურის ნაკლებობით ხალხმა ათწლეულების მანძილზე იზარალა, დღეს Starlink-ის მეშვეობით უკვე ხელმისაწვდომია 100-200 მბ/წმ სიჩქარის, 20 მილიწამამდე დაყოვნების ინტერნეტი“, – განაცხადა SpaceX-ის წარმომადგენელმა.
სტივენ ნელსონმა ასევე აღნიშნა, რომ მომავალი წლიდან Starlink-ს საქართველოში ახალი ბიზნესმოდელების შექმნის გეგმები აქვს.
„მომავალში კიდევ უფრო ბევრი სიახლეა მოსალოდნელი, სპექტრის უფრო ეფექტურად გამოყენებიდან დაწყებული, 1 გბ/წმ-მდე სიჩქარის და დაბალი დაყოვნების ინტერნეტის მიწოდებით დამთავრებული. საქართველოს მდიდარი მემკვიდრეობის, სტრატეგიული ლოკაციის, კომუნიკაციების კომისიის ინოვაციური, მოქნილი მიდგომის და Starlink-ის მოწინავე ტექნოლოგიის შერწყმა ქმნის ძლიერ საფუძველს მდგრადი განვითარებისთვის. მაღალი სიჩქარის და დაბალი დაყოვნების ინტერნეტკავშირის უზრუნველყოფა საქართველოს ნებისმიერ წერტილში ახალ შესაძლებლობებს ქმნის, რაც რეგიონში ციფრულ განვითარებას ახალ ეტაპზე გადაიყვანს“, – აღნიშნა SpaceX-ის სატელიტური პოლიტიკის დირექტორმა.
სესიაზე სტივენ ნელსონმა განმარტა, რა მნიშვნელობა აქვს ციფრულ დერეფნებს და როგორ უწყობენ ისინი ხელს ინოვაციების განვითარებას.
„აღნიშნული დერეფნები თანამედროვე აბრეშუმის გზების ფუნქციას ასრულებენ. ისინი უზრუნველყოფენ მყისიერ კომუნიკაციას, ხელს უწყობენ ტრანსსასაზღვრო თანამშრომლობას, ასევე ახდენენ გლობალური ცოდნისა და ბაზრებზე წვდომის დემოკრატიზაციას. მაგალითისთვის ავიღოთ მაღალმთიანი სოფელი უშგული – ევროპის ერთ-ერთი ყველაზე მაღალი დასახლება. ტრადიციულად, იქ მცხოვრები საზოგადოება ციფრულად იზოლირებული იყო და მას შეზღუდული წვდომა ჰქონდა ონლაინგანათლებაზე, ტელემედიცინასა თუ ეკონომიკურ შესაძლებლობებზე. ასე რომ, არ აქვს მნიშვნელობა, ბიზნესმენი ხართ, რომელიც ამზადებს პრეზენტაციას, სტუდენტი, რომელიც დისტანციურად ერთვება გაკვეთილზე თუ უბრალოდ მამა, რომელმაც შვილები უნდა გაართოს ხანგრძლივი ფრენის დროს – Starlink-ის მეშვეობით თქვენ შეინარჩუნებთ კავშირს და სწრაფად გაიყვანთ დროს“, – განაცხადა სტივენ ნელსონმა.
მისივე თქმით, აღნიშნული შესაძლებლობები არ წარმოადგენს სამომავლო მისწრაფებებს, არამედ Starlink-ის მომხმარებლებისთვის ისინი დღეს უკვე ხელმისაწვდომია მსოფლიოს არაერთ ბაზარზე. როგორც სტივენ ნელსონმა აღნიშნა, კომუნიკაციების კომისიასთან მჭიდრო თანამშრომლობით ამ ტექნოლოგიების შემოტანა 2025 წელს საქართველოშიც იგეგმება.