ერთი ორად სასიხარულოა, რომ სუვერენიტეტზე ლაპარაკობენ იმ ქვეყნის წარმომადგენლები, რომელ ქვეყანასაც სულ რამდენიმე დღის წინაც კი მავნებელი ხელისუფალი მართავდა, – განაცხადა ქართული ოცნების“ აღმასრულებელმა მდივანმა, საპარლამენტო უმრავლესობის ლიდერმა, ფრაქცია „ქართული ოცნების“ თავმჯდომარემ მამუკა მდინარაძემ.
ჟურნალისტმა მას ჰკითხა, რას ფიქრობს აშშ-ის ახალი სახელმწიფო მდივნის განცხადებაზე, რომელმაც მშვიდობაზე ისაუბრა და რომელიც თანხვედრაშია „ქართული ოცნების“ პოლიტიკასთან.
„დღეს „ფეისბუქზეც“ გავაზიარე სტატუსი, მეტი კომენტარი ამას [სახელმწიფო მდივნის განცხადებას] აღარ სჭირდება მეთქი. მართლა ვერ წარმოიდგენდა ბევრი, რამდენიმე თვის წინაც კი, რომ აშშ-ის მოქმედი ხელისუფლების წარმომადგენელი გააკეთებდა ასეთ განცხადებას. განსაკუთრებით განცხადების პირველი ნაწილია მნიშვნელოვანი, სუვერენიტეტზე, რადგან ბაიდენის ადმინისტრაციამ ისეთი განცხადებები და მავნებლობები აკეთა, „დიფ სთეითის“ როლი იმდენად გაზარდა საქართველოში და იმხელა წნეხი იყო, ვერავინ წარმოიდგენდა, რომ ასეთი განცხადება გაკეთდებოდა. ერთი ორად სასიხარულოა, რომ სუვერენიტეტზე ლაპარაკობენ იმ ქვეყნის წარმომადგენლები, რომელ ქვეყანასაც სულ რამდენიმე დღის წინაც კი მავნებელი ხელისუფალი მართავდა“, – აღნიშნა მდინარაძემ.