ყველა ის ბარიერგადალახული პარტია, რომელსაც დღეს რაღაც პატარა რესურსი გააჩნია ნაცის საქმეს აკეთებს, გარედან დავალებებს იღებს და სინქრონულად ერთ მესიჯად საუბრობს, – განაცხადა „ქართული ოცნების“ აღმასრულებელმა მდივანმა, საპარლამენტო უმრავლესობის ლიდერმა, ფრაქცია „ქართული ოცნების“ თავმჯდომარემ მამუკა მდინარაძემ.
„ნაცთან მოღალატე გახარია, მათი რეკეტიორი ხაზარაძე, ნიკა გვარამია, ხოშტარია თუ რომელი არ არის ნაცი? შენ თუ მეკამათები, რომ არა, შენ არ უნდა იყო, ვის უჭერ მხარს? აი ამაზე დაფიქრდი და მიხვდები, რომ ამით ნაცის მობრუნებას ითხოვ და არა ახალ არჩევნებს. როგორც კი ნაცებმა პროევროპელები დაირქვეს, მერე გაყოყლოჩინდნენ და ვითომ რაღაც მორალური უპირატესობის მოპოვებას ცდილობენ. რეალურად არსებობს ძალა, რომელიც საკუთარ სამშობლოს ემსახურება და არსებობენ ძალები, რომლებიც, სამწუხაროდ, სხვას ემსახურებიან და სხვისი მსახურები საქართველოში ხელისუფლებაში ვერასდროს ვერ უნდა მოვიდნენ“, – განაცხადა მდინარაძემ.
ცალკეული ევროპარლამენტარების განცხადებები მდინარაძემ შეაფასა, როგორც ქვეყნის საქმიანობაში თავხედურად ჩარევა. მისი თქმით, მათ მოთხოვნებს არანაირი ფასი არ აქვთ.
„რეზოლუციაში, სადაც შეიძლება ისეთი ოდიოზური და სასტიკი რეჟიმის შემქმნელი ადამიანის – სააკაშვილის გათავისუფლება მოითხოვო და ბიძინა ივანიშვილის განსჯა მოითხოვო რა ფასი შეიძლება ჰქონდეს ალბათ ეს საზოგადოებისთვის ადვილი აღსაქმელია, მაგრამ მთავარი ეს არაა. ახლა რაღაც კუდების ქნევის საშუალებაც ნელ-ნელა გაუქრებათ დროთა განმავლობაში. სამწუხაროდ, ეს ერთ კვირაში და ერთ თვეში არ ხდება, მაგრამ საბოლოო ჯამში ყველა მიმართულებით დადასტურდა, რომ ჩვენ სწორ პოზიციაზე ვდგავართ. მადლობა კიდევ ერთხელ ქართველ ხალხს, ქართული საზოგადოების უმრავლესობამ გადაწყვიტა სიმართლისთვის მხარდაჭერა და არა მილიონებით დაფინანსებული, თავსმოხვეული რაღაც დეზინფორმაციისთვის. ამას მიხვდა ხალხი და გადაარჩინა საკუთარი ქვეყანა. ამ შემთხვევაში „ქართული ოცნება“, მამუკა მდინარაძე და ვინმე სხვა ხელისუფლებაში, პარლამენტში იქნებოდა თუ არა ამას კი არ ჰქონდა მნიშვნელობა, არჩევნები იყო გადამწყვეტი, წყალგამყოფი. ალბათ ერთი კვირაც ვერ მოითმენდნენ და შეასრულებდნენ დავალებას ყოველგვარი პიარული შეფუთვის გარეშე. ჩვენ რომ არ გაგვემარჯვა არჩევნებში ალბათ მართლა ბომბების წვიმები იქნებოდა რომ ნატრულობდა ერთ-ერთი მათი აგენტთაგანი“, – აღნიშნა მდინარაძემ.
მდინარაძემ განაცხადა, რომ ხელისუფლებამ სიმართლით დაანახა ქართველ ხალხს, როგორი შეიძლება ყოფილიყო სწორი მოქმედება და ქართველმა ხალხმაც ამ არჩევნებში სწორად იმოქმედა.
„საყოველთაო ფსიქოზში არიან გადასულები. თქვენ წარმოიდგინეთ რა უბედურია ადამიანი, ერთი წამი რომ მჯეროდეს, რომ ჩემი ქვეყნის მოსახლეობის უმრავლესობამ აირჩია ხელისუფლება, რომელიც ემსახურება პუტინს. ეს რომ დაიჯერო ადამიანმა მართლა უბედური ხარ, შეიძლება გაგიჟდე და აგიჟებენ, ამ მდგომარეობაში ამყოფებენ თავიანთ მომხრეებს. აჯერებენ, რომ ეს ხალხი, ვინც შენი ქვეყნის უმრავლესობამ აირჩია ემსახურება პუტინს და მართლა შეიძლება გული გაგისკდეს და ჭკუიდან გადახვიდე. აი ამ ფსიქოზურ მდგომარეობისთვის სწირავენ თავიანთ მომხრეებს და აი ამ ვირტუალურ და მოდელირებულ რეალობაში აცხოვრებენ. ხალხი, რომელიც ხვდება რაშია საქმე, ხაზავს 41-ს ამ შემთხვევაში იმიტომ, რომ ალტერნატივა სხვა არის ნაცების დაბრუნება ხელისუფლებაში იმიტომ, რომ ყველა ნაცია, ვინც ამ ეტაპზე, სამწუხაროდ, ბარიერს ლახავს და, შესაბამისად, სწორი გადაწყვეტილება მიიღეს და ამ სწორ გადაწყვეტილებას არ ჰპატიობენ ამ ქვეყანას ვიღაც ვიღაცები, მაგრამ კიდევ კარგი იმის ძალა არ გააჩნიათ რომ ამ ქვეყანას და მის არჩეულ ხელისუფლებას მოერიონ“, – აღნიშნა მდინარაძემ.
ცნობისთვის, ევროპარლამენტში „ნაციონალური მოძრაობის“ მოკავშირე დეპუტატებმა გაახმიანეს ოპოზიციის იდენტური გზავნილები, უარგუმენტოდ ითხოვენ ახალ არჩევნებს, საქართველოს დასჯას, ასევე მათთვის აქტუალურია მიხეილ სააკაშვილის გათავისუფლებაც. ევროპარლამენტთა ნაწილმა კოლეგების განცხადებები მწვავედ გააკრიტიკა. ითქვა, რომ ესაა საქართველოს შიდა საქმეებში ჩარევაა. მმართველი გუნდის შეფასებით, „ნაციონალური მოძრაობის“ მოკავშირე ევროპარლამენტების განცხადებები ქვეყნის შიდა საქმეებში ჩარევის მკაფიო მაგალითია. გზავნილები კიდევ ერთხელ ადასტურებს მათ სუბიექტურობას და დავალების შესრულებას.