24 აპრილის მონაცემებით, გირჩის რელიგიურმა ორგანიზაციამ – საქართველოს ქრისტიანულმა, ევანგელისტურმა, პროტესტანტულმა ეკლესიამ – ბიბლიურმა თავისუფლებამ 92 მღვდელმსახური აკურთხა. ინფორმაცია ამის შესახებ On.ge-ს ორგანიზაციიდან მიაწოდეს.
როგორც ორგანიზაციაში აცხადებენ, დღეს 35 მღვდელმსახური აკურთხეს და შესამაბისი მოწმობების რაოდენობა ამოეწურათ. ბიბლიური თავისუფლება მღვდელმსახურების მსურველებს 25 აპრილს, დილის 11 საათიდან ელოდება.
ბიბლიურ თავისუფლებაში ამბობენ, რომ მათი ინფორმაციით, ამ დრომდე, მოწმობის წარდგენის შემდეგ არცერთ მღვდელმსახურს სამხედრო სავალდებულო სამსახურის გადავადებასთან დაკავშირებით პრობლემა არ შექმნია.
გირჩის მიერ რელიგიური ორგანიზაციის დაფუძნების შესახებ ინფორმაცია On.ge-მ 21 აპრილს გაავრცელა. გირჩის წევრებმა 2017 წლის მარტში დააფუძნეს რელიგიური ორგანიზაცია, რომელიც სასულიერო პირებს აკურთხებს და შესაბამის ცნობასაც გასცემს. სასულიერო წოდების მქონე ახალგაზრდები კი, შესაბამისი უწყებებისგან სავალდებულო სამხედრო სამსახურის გადავადებას ითხოვენ და მიზანსაც აღწევენ, რადგან კანონში არსებული ჩანაწერი მათ ამის საშუალებას აძლევს.
www.on.ge