თბილისში რამდენიმე დღის წინ მომხდარი მკვლელობის ახალი დეტალები გახდა ცნობილი.
ბრალდებულის დედა აცხადებს, რომ მისი შვილი სამართალდამცავებს თავად ჩაბარდა და მოკლული მისი ცოლი არასდროს არ ყოფილა.
“ჩემ შვილს ველაპარაკე და მითხრა ესეთი რამე მოხდა, შემომაკვდა, მთვრალი იყოო. შემდეგ პოლიციაში დარეკა. თურმე ოთხი შვილის დედა ქმარმა მოკლა. რომელმა ქმარმა მოკლა? ჩემი შვილი მისი ქმარი ცხოვრებაში არ ყოფილა”, – აცხადებს ბრალდებულის დედა თამარ ჯანაშვილი.
ორი დღის წინ გავრცელებული ინფორმაციით, თბილისში 40 წლის ქალი ყოფილმა ქმარმა მოკლა. ქალბატონი ყოფილმა მეუღლემ ელექტროსადენით გაგუდა. ქალს 4 შვილი დარჩა. შინაგან საქმეთა სამინისტროს ინფორმაციით, მკვლელობა ეჭვიანობის ნიადაგზე მოხდა. პოლიციის ინფორმაციით, ბრალდებული შემთხვევის ადგილიდან მიიმალა.
“შსს-ს თბილისის პოლიციის დეპარტამენტის დეტექტივების სამმართველოს და გლდანი-ნაძალადევის სამმართველოს თანამშრომლებმა, ერთობლივად ჩატარებული ოპერატიულ-სამძებრო და საგამოძიებო ღონისძიებების შედეგად, 1975 წელს დაბადებული გ.ჯ. განზრახ მკვლელობის ბრალდებით დააკავეს.
გამოძიებით დადგინდა, რომ ბრალდებულმა 1977 წელს დაბადებული მ.ვ. ეჭვიანობის ნიადაგზე გაგუდა და შემთხვევის ადგილიდან მიიმალა.
სამართალდამცველებმა გ.ჯ. მომხდარიდან რამდენიმე წუთში, შემთხვევის ადგილის მიმდებარე ტერიტორიაზე დააკავეს.
გამოძიება განზრახ მკვლელობის ფაქტზე მიმდინარეობს (სსკ-ის 108-ე მუხლით)”,- ნათქვამია შსს-ს ინფორმაციაში.
თბილისის საქალაქო სასამართლოს გადაწყვეტილებით, ბრალდებულს წინასწარი პატიმრობა შეეფარდა”.