უმრავლესობის დეპუტატის, ირაკლი სესიაშვილის ინფორმაციით, ავტომობილი, რომელიც თბილისში გაქურდეს, მისი შვილის მეგობარს ეკუთვნის.
როგორც სესიაშვილმა განაცხადა, აქედან გამომდინარე, მისი შვილის ანაბეჭდები მანქანაზე შესაძლოა, არსებობდეს.
„ეს არის ჩემი შვილის ბავშვობის მეგობრის ავტომობილი. 5 წლიდან ჩემი შვილი მეგობრობს ამ ადამიანთან, მისი მშობლები არიან ჩემი ბავშვობის მეგობრები. მათ ჰქონდათ ყოველდღიური ურთიერთობა, ამ მანქანაზე აღმოჩენილია რამდენიმე ადამიანის თითის ანაბეჭდი, მათ შორის, ჩემი შვილის. ეჭვი არ შეეპარება, არც ერთ საღად მოაზროვნე ადამიანს, რომ ეს ბუნებრივია“, – განაცხადა სესიაშვილმა.
თავდაცვისა და უშიშროების კომიტეტის თავმჯდომარემ „ნაციონალური მოძრაობის“ წინააღმდეგ პროკურატურაში განცხადება შეიტანა. უმრავლესობის დეპუტატი ოპონენტებს ცილისწამებაში ადანაშაულებს. როგორც სესიაშვილმა პროკურატურაში შესვლამდე განაცხადა, მისი მთავარი მიზანია საქმის დროული დასრულება და იმის დამტკიცება, რომ მისი შვილი უდანაშაულოა.
„ნაციონალური მოძრაობის“ ინფორმაციით, თბილისში მომხდარი ქურდობის სავარაუდო მონაწილე შესაძლოა, „ქართული ოცნების“ ერთ-ერთი ლიდერის, ირაკლი სესიაშვილის შვილი იყოს. მათი განცხადებით, უმრავლესობის დეპუტატის შვილის მიერ სუს-ში მუშაობის დასაწყებად წარდგენილი დოკუმენტაციიდან ამოღებული ნიმუში და ქურდობის ჩამდენის ხელის ანაბეჭდი იდენტურია.
„ნაციონალური მოძრაობის“ მიერ გავრცელებულ ინფორმაციას სახელმწიფო უსაფრთხოების სამსახურიც გამოეხმაურა. სუს-ი დეპუტატ ირაკლი სესიაშვილის შვილთან, დავით სესიაშვილთან დაკავშირებით რაიმე კანონდარღვევის გამოვლენას უარყოფს. როგორც სუს-ში აცხადებენ, დავით სესიაშვილის სამსახურში მიღებამდე, მისი კანდიდატურის შესწავლა კანონის სრული დაცვით მოხდა.
ირაკლი სესიაშვილი: ავტომობილი, რომელიც გაქურდეს, ჩემი შვილის ბავშვობის მეგობრისაა
2017/04/27 12:41:50
კომენტარები
ნანახია: 1986 ჯერ