ჩემი დაკავების დროს ადგილი ჰქონდა, როგორც ფსიქოლოგიურ, ასევე ფიზიკურ ზეწოლას, რომლის დეტალებზე დღემდე არ მისაუბრია, – ამის შესახებ თბილისის საქალაქო სასამართლოში დაკითხვის დაწყებამდე ფოტორეპორტიორმა ირაკლი გედენიძემ განაცხადა.
როგორც გედენიძემ აღნიშნა, ფიზიკურ ზეწოლას მასზე ადგილი გქონდა ე.წ. მოდულის შენობაში გადაყვანამდე და გადაყვანისას.
რაც შეეხება გლდანის ციხეში არსებულ ვითარებას, სადაც გედენიძე მასთან ერთად დაკავებულ გია აბდალაძესთან და ზურაბ ქურციკიძესთან ერთად გადაიყვანეს, ირაკლი გედენიძე იხსენებს, რომ “საპყრობილეში ამ ყველაფერს დაემატა კონტრდაზვერვის წარმომადგენლის, დავით დევნოზაშვილის მხრიდან ფსიქოლოგიური შანტაჟი”.
“დევნოზაშვილი ფსიქოლოგიურ ზეწოლას ახორციელებდა კიდევ ერთ პირთან ერთად, რომელსაც დღეს დავასახელებ სასამართლოში. ისინი ცდილობდნენ აღიარებითი ჩვენების მოპოვებას ჩემგან, შვილებით და ჩემი მეუღლის პიკანტური ფოტოს გამოქვეყნების მუქარის ფონზე”, – განაცხადა ირაკლი გედენიძემ, რომელიც დღეს დაზარალებულის სტატუსით დაიკითხება.