ამ ლაქას ვერასოდეს ჩამოირეცხავს მათი პარტია, რადგან ეს იქნება მათი აქილევსის ქუსლი – მათი მხრიდან უზნეობის, უსამართლობის, უღირსი ქმედების საუკეთესო მაგალითი, – ასე ეხმიანება დემოგრაფიული აღორძინების ფონდის თავმჯდომარე თამარ ჩიბურდანიძე “ნაციონალური მოძრაობის” წევრების მხრიდან ირაკლი სესიაშვილის ოჯახთან დაკავშირებით გავრცელებულ ინფორმაციას.
”ნაცმოძრაობამ” გამოუსწორებელი პოლიტიკური შეცდომა დაუშვა. ბოლო პერიოდში ”ნაცმოძრაობა” პოლიტიკურ და სტრატეგიულ დაგეგმარებაში სერიოზულ შეცდომებს უშვებს. მაღალი დონის პოლიტიკით არასოდეს გამოირჩეოდნენ, მაგრამ ასეთ შეცდომებს ადრე არ უშვებდნენ პიარის კუთხით. ირაკლი სესიაშვილის შვილთან დაკავშირებით გამართული ბრიფინგი ახალგაზრდა ”ნაციონალის” სულმოუთქმელი გამოხტომა იყო საკუთარი იმიჯის შესაქმნელად, რომელიც ბუნებრივია, გუნდის გადაწყვეტილება იქნებოდა და გამოუსწორებელი შეცდომაც დაუშვეს.
ამ ლაქას ვერასოდეს ჩამოირეცხავს მათი პარტია, რადგან ეს იქნება მათი აქილევსის ქუსლი – მათი მხრიდან უზნეობის, უსამართლობის, უღირსი ქმედების საუკეთესო მაგალითი. ამ მაგალითს ყოველთვის მოიშველიებენ მისი ოპონენტები მათ წინააღმდეგ.
ეს იყო ნაჩქარევი, ”ოცნების” შავ პიარზე აგებული ქმედება, რომელიც საკუთარი პარტიის შავ პიარში გადაეზარდათ. მესმის, რომ ამ ახალგაზრდა კაცს “ლიდერობისთვის” ამზადებენ და ხმაურიან თემებს აძლევენ, მაგრამ ამ კაცს რომ უკვე ღირსება დააკარგვინეს (ალბათ საკუთარი სურვილითაც), ამაზე როგორც ჩანს, მაინცდამაინც არ დარდობენ, მთავარია გაისროლეს, თუმცა, მათვე მოხვდათ.
ბოლო პერიოდში ”ნაცმოძრაობის” ქმედებიდან ჩანს, რომ ძალიან ეჩქარებათ, ოღონდ სად, ვერ გავიგეთ და ამ სიჩქარეში გამოუსწორებელ შეცდომებს უშვებენ”, – წერს ჩიბურდანიძე.