რუსეთის საგარეო საქმეთა სამინისტროს ოფიციალური წარმომადგენელი მარია ზახაროვა აცხადებს, რომ ვოლოდიმირ ზელენსკისა და მის მხარდამჭერ ნატო-ს წევრ ევროპულ ქვეყნებს არ სურთ მშვიდობა და მათი ამოცანა ესკალაციაა.
აღნიშნულის შესახებ ზახაროვამ ბრიფინგზე ისაუბრა.
„მწუხარებით აღვნიშნავთ, რომ ზოგიერთი პოლიტიკური ძალა ევროპაში აგრძელებს ხელის შეშლას ჯერ მხოლოდ დასახული პროცესისთვის, რომელსაც პერსპექტივაში შეუძლია დარეგულირებამდე მისვლა. უკვე თუნდაც ერთი სიტყვა „მშვიდობა“, თუნდაც ერთი სიტყვა „დარეგულირება“ იწვევს მათ აღელვებასს, რადგან მათი მთავარი ამოცანა არის, რა თქმა უნდა, ესკალაცია და ხოცვა“, – აღნიშნა მარია ზახაროვამ.
ზახაროვას თქმით, სწორედ ზელენსკი და მისი მხარდამჭერი ევროკავშირის ლიდერები არიან პასუხისმგებელნი კონფლიქტის გაგრძელებაზე.
„ისინი ემხრობიან შეიარაღების მიწოდების გაგრძელებას, აფინანსებენ ტერორისტულ საქმიანობას და ახლა კიდევ ფიქრობენ რაღაც ფსევდომშვიდობისმყოფლობაზე“, – აღნიშნა ზახაროვამ.
როგორც ზახაროვამ აღნიშნა, უკრაინაში ევროპელი მშვიდობისმყოფელების განთავსება რუსეთისთვის მიუღებელია. მისი თქმით, ეს ნიშნავს რუსეთთან პირდაპირ კონფლიქტში ჩაბმას.
„ჩვენთვის აბსოლუტურად მიუღებელია უკრაინაში სხვა სახელმწიფოების შეიარაღებული ძალების ქვედანაყოფების განთავსება ნებისმიერი დროშის ქვეშ, იქნება ეს უცხოური კონტინგენტები, სამხედრო ბაზები, რაღაც სამშვიდობო ოპერაციები, რომლებსაც გვთავაზობენ ისინი, ვინც სიტყვა „მშვიდობისმყოფელობა“ და „მშვიდობა“ საერთოდ ამოიღეს თავიანთი ლექსიკონიდან. ყველა ეს გადამღერება – ეს ყველაფერი, ცხადია, ნაცნობია, გასაგებია ტკივილამდე, რადგან ეს ყველაფერი ნიშნავს ამ ქვეყნების ჩართვას ჩვენს ქვეყანასთან პირდაპირ შეიარაღებულ კონფლიქტში, რასაც ჩვენ ვუპასუხებთ ყველა არსებული საშუალებით“, – აღნიშნა ზახაროვამ.