აქციების ორგანიზატორების კვალი მხოლოდ და მხოლოდ კოლექტიურ „ნაციონალურ მოძრაობასთან“, აგენტურულ ძალებთან მიდის – თუკი ვინმე გულწრფელია იქ, ე.ი. ამ ადამიანს ბოროტად ატყუებენ და ბოროტად იყენებენ საკუთარი ანტიქართული მიზნების განხორციელებაში, – განაცხადა „ქართული ოცნების“ აღმასრულებელმა მდივანმა, საპარლამენტო უმრავლესობის ლიდერმა, ფრაქცია „ქართული ოცნების“ თავმჯდომარემ მამუკა მდინარაძემ.
მდინარაძემ უპასუხა ჟურნალისტის კითხვას, რომელიც ეხებოდა ამ წუთებში რუსთაველის გამზირზე მიმდინარე აქციასთან, სადაც გამოჩნდა ბანერები სააკაშვილის გათავისუფლების მოთხოვნით.
„ეს მათი ე.წ. პროტესტი არ არის პროტესტი, ეს არის ე.წ. პროტესტი და უფრო სწორად, მას ჰქვია დაორგანიზებული მავნებლობა საქართველოს წინააღმდეგ. იქ თუ არის ვინმე, ვისაც სჯერა კიდევ, რომ საკუთარი ქვეყნის ინტერესებიდან გამომდინარე აპროტესტებს, ნებისმიერ მათგანს შემიძლია ვუთხრა, რომ ამ აქციების ორგანიზატორების კვალი, საბოლოო ჯამში, მაინც მიდის კოლექტიურ „ნაციონალურ მოძრაობასთან“. ბანერები რომც არ იყოს, ჩვენ ხომ ვიცით, რომ საბოლოო ჯამში, მტკიცებულებების დონეზე უკვე დადასტურებულია, რომ ამ აქციების ორგანიზატორების კვალი მხოლოდ და მხოლოდ კოლექტიურ „ნაციონალურ მოძრაობასთან“, აგენტურულ ძალებთან მიდის. შესაბამისად, ამ აგენტურული ძალების მიზნებიც მშვენივრად ვიცით. თუკი ვინმე გულწრფელია იქ, ე.ი. ამ ადამიანს ბოროტად ატყუებენ და ბოროტად იყენებენ საკუთარი ანტიქართული მიზნების განხორციელებაში“, – აღნიშნა მამუკა მდინარაძემ