ჩინელმა სამხედროებმა ტაივანის კუნძულის გარშემო მასშტაბური სამხედრო-საზღვაო წვრთნები დაიწყეს. ინფორმაციას Associated Press-ი ავრცელებს.
ჩინეთის არმიის წარმომადგენლის, ში ის განცხადებით, წვრთნებში მონაწილეობას სამხედრო-საზღვაო, საჰაერო და სარაკეტო ძალები იღებენ. მათი მიზანია „ტაივანის დამოუკიდებლობის მტკიცე შეკავება და სერიოზული გაფრთხილება“, – ციტირებს სააგენტო ჩინეთის არმიის წარმომადგენელს.
Associated Press-ის ინფორმაციით, ჩინეთი ტაივანს საკუთარ ნაწილად აღიქვამს, რომლის აღებას საჭიროების შემთხვევაში ძალით შეძლებს, თუმცა ტაივანელების უმეტესობას კუნძულის ფაქტობრივი დამოუკიდებლობა სურს.
როგორც ტაივანის თავდაცვის სამინისტროში განაცხადეს, კუნძულის გარშემო 19 ჩინური სამხედრო გემი ტრიალებს. „მინდა განვაცხადო, რომ ეს მოქმედებები რეგიონულ მშვიდობასა და სტაბილურობას უთხრის ძირს“, – ციტირებს სააგენტო ტაივანის თავდაცვის მინისტრს, ველინგტონ კუს.
როგორც ჩინეთის არმიაში აცხადებენ, სამხედრო წვრთნები ტაივანის პრეზიდენტის, ლაი ცინგ დეს წინააღმდეგაა მიმართული.