პარიზის სააპელაციო სასამართლომ 2026 წლის ზაფხულში შეიძლება გამოიტანოს გადაწყვეტილება მარინ ლე პენის მიერ გასაჩივრებულ განაჩენზე, რომლითაც სასამართლომ მას მომდევნო არჩევნებში კანდიდატად წარდგენის უფლება ჩამოართვა. ინფორმაციას ამის შესახებ ტელეარხი BFMTV ავრცელებს.
გავრცელებული ინფორმაციით, სასამართლო ინსტანცია სააპელაციო გადაწყვეტილების გამოტანას 2026 წლის ზაფხულში გეგმავს.
როგორც ტელეარხი აკონკრეტებს, აღნიშნული ვადების დასაცავად, სააპელაციო პროცედურა 2026 წლის დასაწყისში უნდა დაიწყოს. ამასთან, ვერდიქტი შესაძლოა საფრანგეთის 2027 წლის საპრეზიდენტო არჩევნებამდე რამდენიმე თვით ადრე გამოცხადდეს.
მარინ ლე პენი ევროკავშირის სახსრების არამიზნობრივი ხარჯვის საქმეზე დამნაშავედ ცნეს.
სასამართლომ მარინ ლე პენს ოთხი წლით თავისუფლების აღკვეთა მიუსაჯა, აქედან ორი წელი შინაპატიმრობა, ორი წელი კი პირობითი სასჯელია, მას ასევე ხუთი წლით აეკრძალა თანამდებობის დაკავება.