დემოკრატმა სენატორმა, ტიმ კეინმა სენატში წარადგინა რეზოლუცია, რომელიც აშშ-ის პრეზიდენტის, დონალდ ტრამპის მიერ კანადისთვის ტარიფების დაწესების შეჩერებას ითვალისწინებს.
სენატორის განცხადებით, კანადა არის ამერიკის მეგობარი, მოკავშირე და არა მოწინააღმდეგე.
რეზოლუციის კენჭისყრა დღეს უნდა გამართულიყო, თუმცა, როგორც სენატორი აღნიშნავს, სავარაუდოდ, 2 აპრილს ჩატარდება. მისივე თქმით, კენჭისყრის შედეგის პროგნოზირება რთულია.
სენატში რეზოლუცია თუ დამტკიცდება, მას წარმომადგენელთა პალატაშიც უნდა დაუჭირონ მხარი. ორივე პალატას კი რესპუბლიკელები აკონტროლებენ.
ამავდროულად, დონალდ ტრამპმა სოციალურ ქსელში დაწერა, რომ კეინი „ცდილობს, შეაჩეროს მნიშვნელოვანი ტარიფები კანადიდან შემოსულ სასიკვდილო ფენტანილზე“. მისივე თქმით, დემოკრატების გამარჯვება იქნება „დამანგრეველი რესპუბლიკური პარტიისთვის და, რაც უფრო მნიშვნელოვანია, შეერთებული შტატებისთვის“.