კანადის პრემიერ-მინისტრ მარკ კარნისა და მექსიკის პრეზიდენტ კლაუდია შეინბაუმს შორის სატელეფონო საუბარი შედგა. ამის შესახებ ინფორმაციას კარნის ოფისი ავრცელებს.
„ლიდერებს ჰქონდათ ნაყოფიერი დიალოგი, სადაც განიხილეს ორ ქვეყანას შორის ძლიერი სავაჭრო და საინვესტიციო ურთიერთობების გაღრმავების მნიშვნელობა, რაც სასარგებლო იქნება როგორც კანადელებისთვის, ასევე მექსიკელებისთვის“, – აღნიშნულია განცხადებაში.
ამასთან, განცხადებაში ნათქვამია, რომ კანადის პრემიერ-მინისტრმა წარმოადგინა გეგმა, რომელიც მიზნად ისახავს კანადის ეკონომიკის გაძლიერებას, სავაჭრო შეზღუდვებისგან დაცვას და მექსიკასთან ვაჭრობის გაფართოებას.
„ლიდერები შეთანხმდნენ, რომ მინისტრები და მაღალი თანამდებობის პირები გააგრძელებენ მუშაობას საერთო პრიორიტეტების წინსვლისთვის. პრემიერ-მინისტრი კარნი და პრეზიდენტი შეინბაუმი შეთანხმდნენ, რომ შეინარჩუნებენ მჭიდრო კონტაქტს“, – ნათქვამია განცხადებაში.