ოპოზიცია უმძიმეს მდგომარეობაშია, ორი დღის წინ ჩატარებული ე.წ. აქციაც იმის დასტური იყო, რომ საზოგადოების მხრიდან მხარდაჭერა ზღვარს ქვემოთ არის, – ამის შესახებ საპარლამენტო უმრავლესობის წევრმა, დავით მათიკაშვილმა განაცხადა.
მათიკაშვილის თქმით, დღითი დღე მცირდება მათი მხარდაჭერა უცხოელებისგან მხრიდანაც.
„ოპოზიცია უმძიმეს მდგომარეობაშია. მათი სიტუაცია უკვე ღიმილის მომგვრელიც აღარ არის. ორი დღის წინ ჩატარებული ე.წ. აქციაც იმის დასტური იყო, რომ საზოგადოების მხრიდან დანაშაულებრივი სინდიკატის მხარდაჭერა აბსოლუტურად ზღვარს ქვემოთ არის დაშვებული. ასევე, იდეა არ აქვთ. ეს ადამიანთა ჯგუფია ძირითადად აგენტებით დაკომპლექტებული, რომელთაც არანაირი გეგმა და იდეა არ აქვთ საკუთარ მოქმედებებთან დაკავშირებით. ზურაბიშვილმა განაცხადა, რომ მათი გეგმა კოორდინაციაა. ე.წ. აქციაზე აქტიური აგენტი პასიური აგენტის, სააკაშვილის დიდი პლაკატების, საზოგადოების მცირე რაოდენობის, სტვენისა და ნეგატიური შეძახილების ფონზე ლაპარაკობდა. რადიკალური ოპოზიცია და კრიმინალური დაჯგუფებები არიან აბსოლუტურად განულებულები როგორც საზოგადოების მხრიდან მხარდაჭერის კუთხით, ასევე დღითი დღე მცირდება უცხოელებისგან, დავალებების მიმცემებისგანაც მათი მხარდაჭერა. პერიოდულად, დროდადრო თითო მაშველ რგოლს გამოუგზავნიან, რათა გულისცემა საერთოდ არ გაუჩერდეთ, ეს იქნება „მეგობარი“ თუ „ანტიმეგობარი აქტი““, – განაცხადა დავით მათიკაშვილმა.