გერმანიას აშშ-თან ტარიფების შესახებ მოლაპარაკებების იმედი აქვს, – ამის შესახებ გერმანიის ფინანსთა მინისტრმა, იორგ კუკისმა განაცხადა.
„ტარიფები აშშ-საც მძიმედ დაარტყამს, რადგან ავტომობილები შეერთებულ შტატებში გაძვირდება, მათ შორის გერმანული ავტომწარმოებლების მიერ აშშ-ში წარმოებული მანქანებიც“, – განაცხადა კუკისმა.
ამასთან, გერმანიის ფინანსთა მინისტრის თქმით, მთავრობას მიაჩნია, რომ მოლაპარაკებების შესაძლებლობა არსებობს.
კუკისმა ხაზგასმით აღნიშნა, რომ გერმანიის მთავრობას ტრამპის ადმინისტრაციასთან „პარტნიორული ტიპის მოლაპარაკებები“ სურს და შედეგი, შეიძლება, რეალურად ტარიფების შემცირება იყოს.
კითხვაზე, რამდენად რეალისტურია ტრამპის ადმინისტრაციასთან თავისუფალი ვაჭრობის შეთანხმებაზე მოლაპარაკებები, კუკისმა განაცხადა, რომ ეს ამჟამად უფრო „მიზანია“, რადგან ვაშინგტონი ახლა უფრო მაღალი ტარიფებისკენ მიდის, ვიდრე დაბალი ტარიფებისკენ.
მისი თქმით, მთავარია ვაშინგტონისთვის სიგნალის გაგზავნა, რომ გერმანია მზად არის, განიხილოს ყველა ვარიანტი, მათ შორის ტარიფების ნულამდე შემცირებაც.
როგორც ცნობილია, დღეს აშშ-ის პრეზიდენტი დონალდ ტრამპი აპირებს, ახალი ტარიფების შემოღების შესახებ განაცხადოს, რომელიც მსოფლიოში აშშ-ის სავაჭრო პარტნიორებს შეეხებათ. ტრამპის თქმით, ტარიფები ყველა ქვეყანას შეეხება.