საფრანგეთის პრეზიდენტმა, ემანუელ მაკრონმა ადგილობრივ კომპანიებს მოუწოდა, შეაჩერონ ნებისმიერი ინვესტიცია აშშ-ში მას შემდეგ, რაც ამერიკელებმა ევროკავშირიდან იმპორტზე საბაჟო გადასახადები დააწესეს. ინფორმაციას ამის შესახებ ფრანგული მედია ავრცელებს.
„მნიშვნელოვანია, რომ მომავალი ინვესტიციები ან ბოლო კვირების განმავლობაში გამოცხადებული ინვესტიციები გარკვეული დროით შეჩერდეს, სანამ შეერთებულ შტატებთან სიტუაციას არ გავარკვევთ“, – აღნიშნა საფრანგეთის ლიდერმა.
მაკრონის თქმით, აზრი არ ექნება მსხვილი ევროპელი მოთამაშეების გამოჩენას, რომლებიც მილიარდობით ევროს ამერიკის ეკონომიკაში ჩადებენ, როცა „ისინი გვირტყამენ“.
აშშ-ის პრეზიდენტმა, დონალდ ტრამპმა ოთხშაბათს განაცხადა, რომ აშშ ყველა ქვეყანას საპასუხო ტარიფებს დაუწესებს.
აშშ-ის ადმინისტრაციის მიერ დაწესებული ტარიფები შემდეგნაირად გამოიყურება: ევროკავშირი 20%, ვიეტნამი 46%, ტაივანი 32%, იაპონია 24%, ინდოეთი 26%, სამხრეთ კორეა 25%, ტაილანდი 36%, ჩინეთი 34% და ა.შ.
„აშშ ვერ გააგრძელებს ეკონომიკური დათმობის ცალმხრივ პოლიტიკას. ჩვენ უნდა ვიზრუნოთ ჩვენს ხალხზე და უპირველეს ყოვლისა, ჩვენს ხალხზე უნდა ვიზრუნოთ“, – აღნიშნა დონალდ ტრამპმა.