როგორი უსინდისო ადამიანი უნდა იყო, რომ ევროკავშირის სახელით განცხადებებს აკეთებდე, რომ მშვიდობიანი მიტინგების დარბევა იყო თბილისშიო. ის იყო მშვიდობიანი მიტინგები?! ლაზარე არის მშვიდობიანი მომიტინგე?! როგორ შეიძლება იმ ადამიანებს სინდისის პატიმრები ვუწოდო,- ამის შესახებ კინორეჟისორმა, გოგა ხაინდრავამ, საქართველოს ჟურნალისტთა ფედერაციაში პრესკონფერენციაზე განაცხადა.
ხაინდრავას თქმით, სინდისის პატიმარი იყო მერაბ კოსტავა და არა ის ვიგინდარები, რომლებიც საკუთარ ძმებს, მამებსა და ბიძებს მოლოტოვის კოქტეილს ესროდნენ.
„სინდისის პატიმარი იყო მერაბ კოსტავა. 11 წელიწადი იჯდა არაფრის გამო, არანაირი დანაშაული არ ჰქონდა ჩადენილი, პრინციპის გულისთვის იმიტომ, რომ საქართველო უყვარდა. 169 დღე შიმშილობდა კარცერში, უბედურ ზონაში, სადღაც რუსეთში, 45 გრადუს ყინვაში და თქვენ ადარებთ ამ ვიგინდარებს, რომლებიც მოლოტოვის კოქტეილს ესროდნენ თავის ძმებს, მამებსა და ბიძებს. მტრებად გამოიყვანეს პოლიციელები, ხომ? ერთი როგორ ვიცხოვრებდით ჩვენ ეს პოლიციელები რომ არ იყვნენ, რა იქნებოდა ქუჩებში ამათ გადამკიდე და მაგათ ეძახით სინდისის პატიმრებს? თავმოყვარეობა აქვს იმას ვინც ამას აკეთებს?! ორი კვირა, ხუთი დღე და ექვსი დღე რომ გაატარეს პოლიციაში სინდისის პატიმრები არიან?! მიტინგებს აწყობენ სინდისის პატიმრების მშობლები, იმ მშობლებს, რომ გაეზარდათ შვილები, რომ ცოცხალი ადამიანი არ უნდა გაიმეტო დასაწვავად, მაშინ სინდისი ექნებოდათ იმ მშობლებს. იმ მშობლებს არ აქვთ სინდისი ესენი რომ გაზარდეს. ლაზარემ მამამისი დაჭრა და სინდისის პატიმარია,“-განაცხადა გოგა ხაინდრავამ.