ტელეკომპანია CBS News-თან ინტერვიუში ნატოს გენერალურმა მდივანმა, მარკ რუტემ განაცხადა, რომ ალიანსის ქვეყნები წელიწადში იმდენ საბრძოლო მასალას აწარმოებენ, რამდენსაც რუსეთი სამ თვეში.
„ჩვენ არ ვაწარმოებთ საკმარისი რაოდენობით თავდაცვით პროდუქტებს. მთელი წლის განმავლობაში იმდენ საბრძოლო მასალას ვაწარმოებთ, რამდენსაც რუსეთი სამ თვეში აწარმოებს. რუსეთის ეკონომიკა ნატოს ეკონომიკის მხოლოდ 5%-ს შეადგენს. შედარებისთვის, ნატოს მთლიანი ეკონომიკა რუსეთის ეკონომიკაზე 20-ჯერ დიდია, თუმცა რუსეთი ოთხჯერ მეტ საბრძოლო მასალას აწარმოებს, ვიდრე მთლიანად ნატო ერთ წელიწადში“, – აღნიშნა ნატოს გენერალურმა მდივანმა.
„ჩვენ არა მხოლოდ ხარჯების გაზრდა, არამედ თავდაცვითი წარმოების გააქტიურებაც გვმართებს. ეს მოიცავს ბიუროკრატიული პროცედურების გამარტივებას, როგორც აშშ-ში, ასევე აქ, ევროპაში“, – დასძინა მარკ რუტემ.