რუსული ძალების მიერ კრივი რიჰზე დარტყმის შედეგად დაღუპულთა რაოდენობა 18-მდე გაიზარდა, მათ შორის 9 ბავშვია. ინფორმაციას უკრაინული მედია ქალაქის თავდაცვის საბჭოს თავმჯდომარეზე, ალექსანდრ ვილკულზე აქვეყნებს.
ასევე გაიზარდა გუშინდელი დარტყმის შედეგად დაშავებულთა რაოდენობა – ბოლო მონაცემებით, დაჭრილია 56 ადამიანი.
ქალაქის საცხოვრებელ რაიონს რუსულმა ძალებმა ბალისტიკური რაკეტით 4 აპრილს დაარტყეს.
რუსეთის თავდაცვის სამინისტროს განცხადებით, დარტყმა რესტორანზე განხორციელდა, სადაც „უკრაინელი და უცხოელი სამხედრო პირების თათბირი მიმდინარეობდა“. მათივე მტკიცებით, დარტყმის შედეგად „მოწინააღმდეგის დანაკარგმა უცხოეთის სახელმწიფოების 85 სამხედრო მოსამსახურე და ოფიცერი შეადგინა“.
უკრაინის გენერალურმა შტაბმა კი რუსეთი ცრუ ინფორმაციის გავრცელებაში დაადანაშაულა და განაცხადა, რომ ბალისტიკური რაკეტა საცხოვრებელ მიკრორაიონს და საბავშვო მოედანს მოხვდა.