სანქცირდებიან მოსამართლეები, რომლებიც არ დაექვემდებარნენ ზეწოლას, ბულინგს და გარე ძალების სურვილს, რომ საქართველოს სასამართლო ჩაეგდოთ ხელში, – ამის შესახებ პარლამენტის საპროცედურო საკითხთა კომიტეტის თავმჯდომარემ, დავით მათიკაშვილმა საქართველოს პირველი არხის გადაცემაში „აქტუალური თემა მაკა ცინცაძესთან ერთად“ სტუმრობისას განაცხადა.
„მარტივ მოცემულობას გეტყვით; ვეტინგზე რომ დათანხმებულიყო სასამართლო კორპუსი – მაგალითად, პირობითად ვთქვათ, რომ დათანხმდა სასამართლოს ეს შემადგენლობა ვეტინგს და იქ რაღაც ტექნიკური ცვლილებები შეიტანა გარეშე ძალებმა, ვინც ვეტინგს ახორციელებს, ანუ, სათავისოდ მოირგო სასამართლო, დამერწმუნეთ, არანაირ კორუფციაზე და არაფორმალურ გავლენებზე საუბარი აღარ იქნებოდა, რადგან ეს ძალები გარანტირებული იქნებოდნენ იმაზე, რომ იმ შემთხვევაში, თუ არჩევნების შედეგად არ მოეწონებოდათ ხელისუფლება, რომელიც იქნებოდა ქართველი ხალხის მიერ არჩეული, ისევე, როგორც ეს მოხდა რუმინეთში, რაც კარგი მაგალითია ამ ყველაფრის, ძალიან მარტივად, სასამართლო იქნებოდა კარგი პლაცდარმი, რომ ეს ყველაფერი ამოტრიალებულიყო და საზოგადოებაში შექმნილიყო ვითარება რევოლუციური სცენარების განვითარებით არალეგიტიმურად შეცვლილიყო ხალხის ნება. ეს უნდოდათ სწორედ სასამართლოსგან და სასამართლო ამას არ დათანხმდა. შესაბამისად, ამ ყველაფერს მოჰყვა ის სანქცია, რომელიც მართლაც ღიმილის მომგვრელია. სრულიად გაუგებარია, რა უნდათ ბრიტანელებს, როდესაც დგამენ ნაბიჯს ყოველგვარი დასაბუთების გარეშე და საქართველოში დამოუკიდებელ ქართველ მოსამართლეს ასანქცირებენ“, – განაცხადა მათიკაშვილმა.
გადაცემის წამყვანის შეკითხვაზე, როგორ შეაფასებს ოპოზიციის განცხადებებს სასანქციო პაკეტებთან დაკავშირებით, რასაც ისინი საკუთარ გამარჯვებად აფასებენ და ამბობენ, რომ საგარეო ზეწოლით მოახერხებენ, მმართველ გუნდს ახალი არჩევნები დაანიშნინონ, დავით მათიკაშვილმა აღნიშნა, რომ რადიკალური ოპოზიცია წინასაარჩევნო პერიოდში პრაქტიკულად, არ ურთიერთობდა საზოგადოებასთან და საკუთარი ბნელი ვიწროპარტიული ინტერესების მხარდაჭერას ქვეყნის ფარგლებს გარედან ელოდებოდა. მათიკაშვილის შეფასებით, ეს არის აგენტურის ჩვეულებრივი სცენარი პოლიტიკაში, როდესაც „საკუთარი ბედ-იღბლის გადამწყვეტი ხარ არა შენ, არამედ ელოდები მაშველ რგოლებს, რომ მათი დახმარებით მოახდინო რაღაც წარმატების მიღწევა“.
„სანქციების იმედი რომ აქვთ, ეს არის სწორედ მაშველი რგოლი, მათი აზრით; მათ რადიკალურ, ექსტრემისტულ ტვინებში ასეა მოხარშული, რომ ეს მოახდენს ზეწოლას საქართველოზე, მერე გამოვა ქართველი ხალხი და კვლავ რადიკალებს მისცემს ხმას, მაგრამ ასე არ მოხდება, აღარ მოხდება და 31 მარტის ე.წ. აქცია იყო იმის დასტური, საბოლოო წერტილი, რომ ამათაც შეიგნონ, ყველამ, ვისაც კიდევ რამე ფორმით ილუზორული ფანტაზიები გააჩნია, რომ ქართველი ხალხი რადიკალიზმს, ექსტრემიზმს და აგენტურას საქართველოში ხმას აღარ მისცემს“, – განაცხადა მათიკაშვილმა.
დავით მათიკაშვილმა ასევე აღნიშნა, რომ ძალიან არის ფესვგადგმული ის არაფორმალური გავლენების მქონე ძალები, რომლებიც „დიფ სთეითად“ არის წოდებული და ეს არ არის დონალდის მოგონილი ტერმინი, ძალიან დიდი ხანია, არსებობს პოლიტიკურ მეცნიერებაში და ისედაც, ვინც პოლიტიკით არის დაინტერესებული, იცის, რას ნიშნავს „დიფ სთეითი“.
„ეს არის სახელმწიფო სახელმწიფოში; ეს არის ძალები, რომლებიც არც არავის აურჩევია და არანაირი ლეგიტიმაცია მათთვის არ მიუციათ, მაგრამ რეალურად, ისინი დიდწილად მართავენ პროცესებს“, – განაცხადა მათიკაშვილმა.
მისივე თქმით, გარედან ზეწოლის ყველა ტალღას საქართველოს ხელისუფლება ძალიან მყისიერ, სწორ წინააღმდეგობას, ნაბიჯებს ახვედრებდა.
„სწორედ ამის დამსახურებაა ის, რომ „ქვეყანა ასცდა ომის რეალურ საფრთხეს და დამოუკიდებლობის მოპოვების შემდეგ საქართველო არის ყველაზე მეტად დამოუკიდებელი, სუვერენული ქვეყანა“, – განაცხადა მათიკაშვილმა.