პარტია “ხალხის ძალის” წევრი თამარ ჩიბურდანიძე 36 წლის წინ 9 აპრილს განვითარებულ მოვლენებს სოციალურ ქსელში ეხმიანება.
„აქამდე რთული გზა განვვლეთ და კიდევ რთული გზა გვაქვს გასავლელი საქართველოს სრული დამოუკიდებლობისთვის. ამასაც გავივლით უიარაღოდ, მაგრამ იარაღზე უფრო ძლიერი
სიტყვით”- წერს ექსპერტი სოციალურ ქსელში და აღნიშნავს, რომ 9 აპრილის თაობა ყველაზე მეტად განიცდის დღევანდელ რეალობას, როდესაც ხედავს, რომ კვლავ თავისუფლებისა და სუვერენიტეტისთვის იბრძვის ქვეყანა. თამარ ჩიბურდანიძის თქმით, ქვეყნის დამოუკიდებლობისთვის ბრძოლა გრძელდება, თუმცა ამჯერად მშვიდობიანი ომით, რაც იმაზე რთულია, ვიდრე შეიარაღებული ბრძოლა მტერთან.
ექსპერტი მადლობას უხდის 9 აპრილის გმირებს და ყველა ადამიანს, ვინც ქვეყნის დამოუკიდებლობისთვის გასწირა თავი.
“9 აპრილის თაობა ყველაზე მეტად განიცდის იმ რეალობას, რის წინაშეც დგას დღეს საქართველო – კვლავ თავისუფლებისთვის და სუვერენიტეტისთვის ბრძოლა. სულ რაღაც 36 წელი გავიდა იმ დღიდან, როდესაც ქართველებმა სისხლით გამოვისყიდეთ ჩვენი თავისუფლება, უარი ვთქვით ერთი რეჟიმის ბატონობაზე, თუმცა, მივიღეთ სხვა რეჟიმის ბატონობა. საბედნიეროდ, სხვა რეჟიმის მორჩილება უფრო მოკლევადიანი აღმოჩნდა, ვიდრე საბჭოეთის.
ქვეყნის დამოუკიდებლობისთვის ბრძოლა გრძელდება დღესაც. საქართველოს ისტორიაში დაიწყო ახალი ეტაპი, რომელიც ქვეყანას სრულ სუვერენიტეტს მოუტანს. ეს ეტაპებიც ჩვენი გასავლელი იყო და ამ გზას გავდივართ უკვე მშვიდობიანი ომით, რაც ბევრად უფრო რთული აღმოჩნდა, ვიდრე შეიარაღებული ბრძოლა მტერთან.
დღეს საქართველოს ახალ ისტორიას ვწერთ. თუ როგორი იქნება ქვეყნის მომავალი, ახლა უკვე ჩვენზეა დამოკიდებული და არა იმ ქვეყნებზე, რომელთა დღის წესრიგიც ცვლიდა პროცესებს ჩვენს ქვეყანაში. აქამდე რთული გზა განვვლეთ და კიდევ რთული გზა გვაქვს გასავლელი საქართველოს სრული დამოუკიდებლობისთვის. ამასაც გავივლით უიარაღოდ, მაგრამ იარაღზე უფრო ძლიერი სიტყვით, საქმით და გონიერებით.
მადლობა 9 აპრილს დაღუპულ მამულიშვილებს!
მადლობა ყველა გმირს, ვინც ქვეყნის დამოუკიდებლობისთვის გაწირა თავი! მათი ბრძოლა გრძელდება მშვიდობიანი, მაგრამ კიდევ უფრო რთული ბრძოლით, რომელიც შედეგს აუცილებლად მოიტანს!”– წერს თამარ ჩიბურდანიძე სოციალურ ქსელში.
