იყო სასწაული რაღაცა, ისიც კი შეეშინდათ, რომ მიცვალებულისთვის საფლავი გაეთხარა ვინმეს. ყველა უარს გვეუბნებოდა შეშინებული. აფრთხილებდნენ, რომ არ მოგვკარებოდა არავინ ახლოს ჩვენ. ახლობლების დახმარებით ოჯახმა გავთხარეთ საფლავი, – ამის შესახებ 2008 წლის აგვისტოს ომის მონაწილის, სერჟანტ როინ შავაძის მეუღლემ, ციცინო შავაძემ, პარლამენტის დროებითი საგამოძიებო კომისიის სხდომაზე განაცხადა, სადაც როინ შავაძის მკვლელობის საქმის განხილვა მიმდინარეობს.
როგორც მან აღნიშნა, გასვენების დროს მათ ახლობლებს ურეკავდნენ და ეუბნებოდნენ, რომ ჯობდა დაეტოვებინათ იქაურობა და გასცლოდნენ როინ შავაძის ოჯახს.
„იძულებით სწრაფად მესამე დღესვე გავიყვანეთ სახლიდან და როდესაც გავედით გზის სამშენებლო სამუშაოები იყო და მიცვალებული იმდენად დაჭრილი იყო, რომ მოდიოდა სისხლი და ვიფიქრეთ სწორ ასფალტიანი გზით წავსულიყავით, რომ მიცვალებულს ბევრი არ ექანავა და ცუდად არ გამოჩენილიყო. ამიტომ მოგვიწია ბენზედან ქალაქიდან გასვლა ბარცხანით ჩაისუბნისკენ ზედა გზით წასვლა და მათ ეგონათ, რომ ჩვენ რაღაცას ვაპირებდით ისეთს და იყო უამრავი მანქანა, უცხო, უნომრო მანქანები ამოგვიდგნენ წინ და უკან. ეგონათ ამით ჩვენ რაღაცა მანიპულირებას ვაკეთებდით, რომ ან ქალაქისკენ მიგვყავდა სადმე ან რაღაცა და როდესაც შევუხვიეთ ჩვენს გზაზე, სადაც სასაფლაოა, მანქანები დარჩნენ ჩვეულებრივად, ოღონდ ვინც ახლობლები გვახლდნენ, ყველას ურეკავდნენ და ეუბნებოდნენ, რომ ჯობდა დაეტოვებინათ იქაურობა და გასცლოდნენ“, – განაცხადა ციცინო შავაძემ.
თეა წულუკიანის კითხვას, თუ ვინ აფრთხილებდა ტელეფონით ხალხს, ციცინო შავაძემ უპასუხა – „რა თქმა უნდა იმ დროინდელი მთავრობა, აბა მეტი ვის უნდა გაეკეთებინა“.